नीता घतानी

नेकपा (एमाले) की सांसद पद्मा अर्यालले प्रधानमन्त्री संसदप्रति उत्तरदायी हुनुपर्ने र नियमावली अनुसार महिनामा एक पटक उपस्थित भई जवाफ दिनुपर्ने व्यवस्था कार्यान्वयन गराउन माग गरेकी छन्। यसैबीच, अर्की एमाले सांसद नीता घतानीले प्रधानमन्त्रीले जनताको प्रश्नको जवाफ नदिएर लोकतन्त्रको अपमान गरिरहेको आरोप लगाएकी छन्।

प्रतिनिधिसभा सदस्य नीता घतानीले दलित समुदायमाथि डेरा खोज्दादेखि समाजका विभिन्न चरणमा हुने विभेदको अन्त्य गर्न सरकारको ध्यानाकर्षण गराएकी छन्। उनले माइतीघर मण्डलामा दीपा नेपालीले कोठा खाली छ सरकार? भन्दै सत्याग्रह धर्ना बसेको विषय संसद्मा जानकारी गराउँदै संविधानमा समता र छुवाछुतमुक्त राष्ट्र घोषणा गरिए पनि व्यवहारमा कार्यान्वयन फितलो रहेको बताइन्। सांसद घतानीले दलित समुदायका शिक्षित वर्गले समेत जातकै कारण विभेद भोग्नुपरेको यथार्थ घटना सुनाउँदै मानवअधिकारको संरक्षण गर्न सरकारलाई अनुरोध गरिन्।

प्रतिनिधिसभा बैठकमा सांसदहरूले दलित समुदायमाथि हुने जातीय विभेद अन्त्य गर्न, सुकुमवासी समस्या समाधान गर्न र राष्ट्रिय स्वतन्त्र पार्टीका सांसद कृष्णकुमार कार्कीमाथि लागेको आरोपबारे सरकारको ध्यानाकर्षण गराएका छन्। सांसदहरूले संविधानमा व्यवस्था गरिएका समानता र सामाजिक न्यायका हक व्यवहारमा कार्यान्वयन नभएको भन्दै सरकारको ध्यानाकर्षण गराएका हुन्।

प्रतिनिधिसभाको बैठकमा सांसदहरूले मुलुकका विभिन्न समसामयिक विषयमा सरकारको ध्यानाकर्षण गराएका छन्। सांसदहरूले सुकुमवासी समस्या, पाथीभरा केबलकार निर्माणको विषयमा सरकारको आधिकारिक धारणा र दलित समुदायमाथि हुने विभेद अन्त्य गर्नुपर्ने माग गरेका छन्। यसका साथै आत्महत्याका घटनामाथि छानबिनको माग पनि उठेको छ।