मधुकुमार चौलागाईं

प्रतिनिधि सभाका सांसदहरूले होल्डिङ सेन्टरमा रहेका सुकुम्बासीहरू गम्भीर मानसिक तनाव र मानवअधिकार संकटमा रहेको भन्दै सरकारलाई उनीहरूको पुनर्स्थापना र न्यूनतम मानवअधिकार सुनिश्चित गर्न आग्रह गरेका छन्। कानुन, न्याय तथा मानव अधिकार समितिको बैठकमा सांसदहरूले सुकुम्बासीहरूको अवस्था दयनीय रहेको उल्लेख गर्दै वैज्ञानिक र दीर्घकालीन पुनर्स्थापना योजना आवश्यक रहेको बताएका हुन्। उनीहरूले राज्यले उपलब्ध गराएको न्यूनतम सुविधा पर्याप्त नभएको र गोपनीयता, भेन्टिलेसन तथा वर्षायाममा जोखिम जस्ता समस्या रहेको औंल्याएका छन्।