पोखरा स्पोर्ट्स अवार्डमा प्रदीप खड्का र नारायणी भण्डारी वर्ष खेलाडी घोषित

नेपाल खेलकुद पत्रकार मञ्च गण्डकीले आयोजना गरेको १०औं रारा पोखरा स्पोर्ट्स अवार्ड–२०८२ मा टेनिसका प्रदीप खड्का उत्कृष्ट पुरुष खेलाडी र एथ्लेटिक्सकी नारायणी भण्डारी उत्कृष्ट महिला खेलाडी घोषित भएका छन्। पोखरामा आयोजित कार्यक्रममा उनीहरूले अवार्डसहित हिरोको जुम स्कुटर प्राप्त गरे। यसैगरी, भलिबल खेलाडी राजन दर्लामी मगरले दर्शकको भोटका आधारमा पिपुल्स च्वाइस अवार्ड जिते।

• वर्ष उत्कृष्ट पुरुष खेलाडीको मनोनयनमा प्रदीप खड्कासँगै जुडोका विज्ञान टि खत्री र भलिबलका सञ्जुविक्रम शाह थिए भने महिलातर्फ नारायणी भण्डारीसँगै जुडोकी मनीषा तामाङ र आर्चरीकी मोनिका रानामगर मनोनयनमा परेका थिए।
• पिपुल्स च्वाइस अवार्डका लागि भलिबलका राजन दर्लामी मगर, फुटबलका दीप कार्की, एथ्लेटिक्सकी नारायणी भण्डारी, आइटिएफ तेक्वान्दोकी सुस्मिता थापामगर र क्रिकेटका विपीन खत्री मनोनयनमा परेका थिए।
• लाइफटाइम एचिभमेन्ट अवार्ड एथ्लेटिक्सका खेलाडी टीका बहादुर बोगटीलाई प्रदान गरियो।
• वर्ष उत्कृष्ट खेल संघमा कास्की जिल्ला क्रिकेट संघ, वर्ष उदीयमान खेलाडी ब्याडमिन्टनकी नीभा राई, स्पेशल अवार्ड पारा खेलाडी सुस्मा तामाङ, वर्ष उत्कृष्ट प्रशिक्षक सिद्धान्त अधिकारी र वर्ष उत्कृष्ट खेल पत्रकार अवार्डबाट दीननाथ बराल सम्मानित भए।