एसियाली खेलकुद

मलेसियामा जारी एसियाली खेलकुद महिला क्रिकेट छनोटमा नेपालले चीनलाई १२६ रनको लक्ष्य दिएको छ। टस जितेर पहिले ब्याटिङ गरेको नेपालले २० ओभरमा ५ विकेट गुमाउँदै १२५ रन बनायो, जसमा पूजा महतोले ६३ रनको अर्धशतकीय इनिङ खेलिन्। यो प्रतियोगितामा नेपालको पहिलो खेल हो भने चीनले आफ्नो पहिलो खेलमा इन्डोनेसियालाई पराजित गरेको थियो।

नेपाल ओलम्पिक कमिटी (एनओसी) र चिनियाँ स्पोर्टिङ किट ब्रान्ड पेलियटबीच २०औँ एसियाली खेलकुद र सन् २०२८ को लस एन्जलस ओलम्पिकमा नेपाली खेलाडीहरूलाई खेल सामग्री उपलब्ध गराउने सम्झौता भएको छ। एनओसीका अध्यक्ष जीवनराम श्रेष्ठ र पेलियटका उपाध्यक्ष चाओ लीले सम्झौता पत्रमा हस्ताक्षर गरेका छन्। यस सम्झौताअनुसार पेलियटले नेपाली खेलाडी, प्रशिक्षक र पदाधिकारीहरूका लागि आधिकारिक किट आपूर्तिकर्ताको रूपमा काम गर्नेछ।