घरेलु तथा साना उद्योग महासंघ

आगामी आर्थिक वर्षको बजेट निर्माणको पूर्वसन्ध्यामा विभिन्न व्यावसायिक क्षेत्रका प्रतिनिधिहरूले सरकारलाई करको भार घटाउन, कानुनी झन्झट अन्त्य गर्न र उद्यममैत्री वातावरण निर्माण गर्न आग्रह गरेका छन्। काठमाडौंमा आयोजित एक छलफल कार्यक्रममा सूचना प्रविधि, मोबाइल, साना उद्योग, औषधि र सीमापार व्यापार क्षेत्रका अगुवाहरूले राज्यको ‘अनुदार’ नीतिले लगानी र व्यवसायिक उत्साह दुवै घटिरहेको बताएका छन्। कम्प्युटर एशोसिएशन नेपाल महासंघ (क्यान महासंघ) का कार्यवाहक अध्यक्ष चिरञ्जीवी अधिकारीले इन्टरनेट र हार्डवेयरमा उच्च कर लगाएर डिजिटल नेपालको सपना साकार नहुने बताए।

नेपाल घरेलु तथा साना उद्योग महासंघका वरिष्ठ उपाध्यक्ष सुर्य कँडेलले देशको आर्थिक आत्मनिर्भरताका लागि उत्पादनमुखी नीति, स्वदेशी वस्तुको उपभोग प्रवद्र्धन र प्रविधिमैत्री उद्योग विस्तार अपरिहार्य भएको बताएका छन्। उनले राजनीतिक परिवर्तन भए पनि आर्थिक संरचनामा अपेक्षित सुधार नआएको र युवाहरू रोजगारीका लागि विदेशिन बाध्य भएको टिप्पणी गरे। कँडेलले घरेलु तथा साना उद्योग क्षेत्रलाई राज्यले प्राथमिकतामा राख्न नसकेको आरोप लगाएका छन्।