परिवर्तन अभियान नेपाल

परिवर्तन अभियान नेपालले तारकेश्वर नगरपालिकामा एसईई परीक्षा उत्तीर्ण विद्यार्थीहरूको सम्मानमा आयोजना गरेको कार्यक्रममा विभिन्न राजनीतिक दलका नेताहरूले अनुशासन र नैतिक मूल्य मान्यतालाई वर्तमान समाजको आवश्यकता बताएका छन्। नेपाली कांग्रेसका नेता अर्जुननरसिंह केसीले विद्यार्थीहरूलाई सामाजिक मूल्यका बारेमा जानकारी दिनुका साथै अनुशासनमा राख्नुपर्नेमा जोड दिए। कार्यक्रममा विद्यार्थीहरूलाई निःशुल्क शैक्षिक परामर्श र छात्रवृत्तिको व्यवस्था मिलाउने प्रतिबद्धता पनि व्यक्त गरियो।

परिवर्तन अभियान नेपालले हालै सम्पन्न माध्यमिक शिक्षा परीक्षा (एसईई) मा उत्तीर्ण भएका तारकेश्वर नगरपालिकाका विद्यार्थीहरूलाई सम्मान गरेको छ। कार्यक्रममा नेपाली कांग्रेसका नेता एवं सांसद अर्जुननरसिंह केसी, सांसद खुश्बु ओली, सांसद केपी खनाल र सांसद निष्कल राईले विद्यार्थीहरूलाई शुभकामना दिँदै स्वदेशमै भविष्य खोज्न र आत्मनिर्भर बन्न प्रेरित गरेका छन्।

नेपाली कांग्रेसका सांसद अर्जुननरसिंह केसीले लोकतान्त्रिक परम्परा र संवैधानिक अभ्यासको पालना अनिवार्य रहेको बताएका छन्। उनले लोकतान्त्रिक मूल्यमान्यताभन्दा बाहिर जाने प्रवृत्ति निरंकुश हुने टिप्पणी गर्दै वर्तमान सरकारले लोकतान्त्रिक परम्पराभित्र रहेर काम गर्नुपर्ने आवश्यकता औंल्याए। केसीले प्रधानमन्त्रीको संसदमा अनुपस्थितिलाई लिएर आफ्नो दलले गम्भीर चासो व्यक्त गरेको पनि बताए।

राष्ट्रिय प्रजातन्त्र पार्टी (राप्रपा)की प्रमुख सचेतक एवं सांसद खुस्बु ओलीले यस वर्षको एसईई परीक्षामा ठूलो संख्यामा विद्यार्थी अनुत्तीर्ण भएकोमा चिन्ता व्यक्त गरेकी छन्। उनले सफल विद्यार्थीको मात्र उत्सव नमनाई अनुत्तीर्ण विद्यार्थीको अवस्थाप्रति पनि ध्यान दिनुपर्ने र उनीहरूलाई शिक्षाको मूल प्रवाहबाट टाढा हुन नदिनुपर्ने बताएकी छन्।