मोहन शर्मा

प्रधानसेनापति अशोकराज सिग्देलले नेपाली सेना स्वास्थ्य विज्ञान संस्थानलाई दक्ष, गुणस्तरीय, अनुशासित र कर्तव्यनिष्ठ जनशक्ति उत्पादन गर्न आग्रह गरेका छन्। संस्थानको १५औँ स्थापना दिवसका अवसरमा आयोजित कार्यक्रममा बोल्दै उनले मुलुकको स्वास्थ्य क्षेत्रमा जनशक्तिको आवश्यकतालाई मध्यनजर गरी उत्कृष्ट शैक्षिक संस्थाका रूपमा आफूलाई स्थापित गर्न शुभकामना दिए। यस अवसरमा उत्कृष्ट विद्यार्थी, चिकित्सक र कर्मचारीहरूलाई पुरस्कार तथा सम्मान प्रदान गरिएको थियो।

त्रिभुवन विश्वविद्यालय अन्तर्गतको मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा नेपालमै पहिलो पटक मुटुको भल्ब प्रत्यारोपणसम्बन्धी 'वेट ल्याब' सञ्चालन गरिएको छ। यसको मुख्य उद्देश्य नयाँ पुस्ताका मुटु शल्यचिकित्सकहरूलाई मुटुको भल्ब फेर्ने आधुनिक प्रविधिबारे व्यवहारिक प्रशिक्षण दिनु हो। यसले युवा चिकित्सकमा मुटु शल्यचिकित्साप्रतिको आकर्षण बढाउने र दक्ष जनशक्ति उत्पादनमा योगदान पुर्‍याउने विश्वास गरिएको छ।