सीएनआई युवा उद्यमी मञ्चद्वारा नेपालको आर्थिक र औद्योगिक अवस्थाबारे उच्चस्तरीय छलफल

राष्ट्रिय स्वतन्त्र पार्टीका सांसद गणेश पराजुलीले नेपाल र रोमानियाबीच व्यापार, लगानी, पर्यटन र श्रम सहकार्य विस्तारको ठूलो सम्भावना रहेको बताएका छन्। काठमाडौंमा आयोजित नेपाल–रोमानिया व्यापार मञ्चको कार्यक्रममा बोल्दै उनले नेपालले उच्च गुणस्तरका गार्मेन्ट, हस्तकला, जडीबुटी, कृषि उत्पादन र सूचना प्रविधि सेवा उपलब्ध गराउन सक्ने तथा रोमानियाली लगानीकर्ताहरूलाई पूर्वाधार, जलविद्युत, पर्यटन, सूचना प्रविधि र उत्पादन क्षेत्रमा लगानी गर्न आह्वान गरे। उनले रोमानियालाई युरोपेली संघको प्रवेशद्वारका रूपमा उल्लेख गर्दै बजार पहुँच, प्रविधि हस्तान्तरण र औद्योगिक सहकार्यका लागि महत्वपूर्ण अवसर रहेको धारणा राखे।

बेलायतको विकास वित्त संस्था ब्रिटिश इन्टरनेशनल इन्भेस्टमेन्ट (BII) र लक्ष्मी सनराइज बैंक लिमिटेड (LSL) बीच २ करोड ५० लाख अमेरिकी डलर बराबरको कर्जा सुविधा सम्झौता भएको छ। यस सम्झौताले नेपालका लघु, साना तथा मझौला उद्यम (MSMEs) लाई वित्तीय पहुँच विस्तार गर्ने र विशेषगरी महिला उद्यमीलाई प्रोत्साहन गर्ने उद्देश्य राखेको छ। यस लगानीमार्फत लक्ष्मी सनराइज बैंकले एमएसएमई क्षेत्रमा दीर्घकालीन कर्जा प्रवाह विस्तार गर्नेछ, जसको ३० प्रतिशत हिस्सा महिला नेतृत्वका व्यवसायका लागि छुट्याइने छ।

अर्थमन्त्री डा. स्वर्णिम वाग्लेले संघीय संसद्मा आर्थिक वर्ष २०८२/८३ को आर्थिक सर्वेक्षण प्रस्तुत गर्दै चालू आर्थिक वर्षमा नेपालको अर्थतन्त्र ३.८५ प्रतिशतले विस्तार हुने अनुमान गरिएको बताएका छन्। विश्व अर्थतन्त्र ३.१ प्रतिशतमा खुम्चने प्रक्षेपण भइरहेका बेला नेपालको यो वृद्धिदरलाई सकारात्मक मानिएको छ। सर्वेक्षणअनुसार मुलुकको अर्थतन्त्रको कुल आकार ६६ खर्ब रुपैयाँ पुग्ने र नेपालीको प्रतिव्यक्ति कुल राष्ट्रिय आय १,५३५ अमेरिकी डलर पुग्ने प्रक्षेपण गरिएको छ।

सरकारले सार्वजनिक गरेको एक प्रतिवेदनअनुसार नेपालमा सञ्चालित ४५ सार्वजनिक संस्थानमध्ये २७ वटा नाफामा र १६ वटा घाटामा सञ्चालित छन्। बाँकी दुई संस्थान बन्द छन्। प्रतिवेदनले कमजोर व्यवस्थापन, वित्तीय अनुशासनहीनता र संरचनात्मक सङ्कटबाट गुज्रिरहेका संस्थानहरूको अवस्था मिश्रित रहेको देखाएको छ।