चलचित्र विधेयकमाथि प्रतिनिधिसभामा छलफल हुने, किम्फ महोत्सव सुरु

म्युजिकल सर्ट फिल्म ‘तिमी-एक रहस्य’मा समावेश ‘नौ डाँडा काटेर’ बोलको गीत सार्वजनिक गरिएको छ। नर्वेमा रहेका नेपाली युवाहरूको संस्था धड्कन नेपाल ग्रुपले निर्माण गरेको यस गीतमा प्रताप दासको स्वर, प्रताप शाहीको शब्द र सुवास पुन मगरको सङ्गीत छ। गीत सार्वजनिक गर्नुअघि निर्माण टोलीले भक्तपुरस्थित सहारा केयर सेन्टरमा आश्रित वृद्धवृद्धालाई आर्थिक सहयोग हस्तान्तरण गरेको थियो।

प्रेस काउन्सिल नेपालले अनलाइन समाचार पोर्टल र सामाजिक सञ्जालमा पत्रकार आचारसंहिता विपरीत सामग्री सम्प्रेषण भएको भन्दै चिन्ता व्यक्त गरेको छ। काउन्सिलका अनुसार केही अनलाइन पोर्टल तथा सञ्चारकर्मीले ‘भ्युज’ बढाउने र मोनिटाइजेसनमा केन्द्रित भएर अपुष्ट र सनसनीपूर्ण सामग्री प्रसारण गर्ने प्रवृत्ति बढेको छ। यस्तो अभ्यासले पत्रकारिताको विश्वसनीयतामाथि असर पार्ने काउन्सिलको ठहर छ।

काठमाडौं महानगरपालिका वडा नम्बर ६ को आयोजनामा आगामी जेठ २३ गते ‘बौद्ध महोत्सव २०८३’ आयोजना हुने भएको छ। “हाम्रो संस्कृति, हाम्रो उत्सव” भन्ने नाराका साथ सञ्चालन हुने यस महोत्सवले बौद्ध क्षेत्रको धार्मिक, सांस्कृतिक तथा ऐतिहासिक सम्पदाको प्रवर्द्धन गर्ने लक्ष्य राखेको छ। वडा अध्यक्ष भुवन लामाका अनुसार यो महोत्सव बौद्ध क्षेत्रको संस्कृति, पर्यटन, स्थानीय व्यवसाय र समुदायलाई जोड्ने साझा अभियान हो।

उच्च अदालत पाटनले नेपाली चलचित्र ‘लालीबजार’ मा प्रयोग गरिएका आपत्तिजनक शब्दहरूलाई हटाएर मात्र प्रदर्शन गर्न आदेश दिएको छ। सामाजिक अभियान्ता रोशनी नेपालीले वादी समुदायको आत्मसम्मानमा ठेस पुग्ने गरी चित्रण गरिएको भन्दै फिल्म प्रदर्शन रोक्न माग गर्दै रिट दायर गरेकी थिइन्। अदालतले ‘वादी’, ‘राजासाबकोमा चलाउने प्रसाद’ र ‘राजाको सामान’ जस्ता शब्दहरू नसुनिने (म्युट) बनाएर मात्र प्रदर्शन गर्न भनेको छ।