इजरायली सेना

गाजाका स्वास्थ्य अधिकारीहरूका अनुसार मंगलबार इजरायली हवाई आक्रमणमा कम्तीमा ७ जनाको मृत्यु भएको छ, जसमध्ये ५ जनाको ज्यान एउटा आक्रमणमै गएको छ। यो घटना इजरायल र हमासबीच अक्टोबर १० देखि लागू भएको युद्धविरामका बीच पनि गाजामा जारी हिंसाको पछिल्लो उदाहरण हो। हमासअन्तर्गत सञ्चालित नागरिक सुरक्षा एजेन्सीले पूर्वी अल–मघाजी क्षेत्रमा नागरिकहरूको समूहलाई लक्षित गरी गरिएको आक्रमणपछि ५ जनाको शव र केही घाइतेलाई अस्पताल लगिएको जनाएको छ।

इजरायली सेनाले दक्षिणी लेबनानमा हवाई आक्रमण गरी दुई सशस्त्र व्यक्तिहरूलाई मारेको दाबी गरेको छ। लेबनानको राष्ट्रिय समाचार एजेन्सीले दक्षिणी टायर जिल्लामा भएको आक्रमणमा चार जनाको मृत्यु र दुई चिकित्सक घाइते भएको जनाएको छ। अप्रिल १७ मा युद्धविराम सुरु भए पनि इजरायलले हेजबुल्लाहलाई लक्षित गरी आक्रमण जारी राखेको छ।

उत्तरी गाजा पट्टीस्थित एक प्रहरी चौकीमा इजरायली सेनाले गरेको हवाई आक्रमणमा पाँच प्यालेस्टिनी प्रहरीको मृत्यु भएको छ । गाजाको प्रहरी महानिर्देशनालयले घटनाको पुष्टि गर्दै गाजा शहरको उत्तरपश्चिममा रहेको अल–तुआम क्षेत्रमा इजरायली ड्रोनले दुईवटा मिसाइल प्रहार गरेको जनाएको छ । यस आक्रमणमा ६ जनाभन्दा बढी घाइते भएको र उनीहरूलाई उपचारका लागि अस्पताल भर्ना गरिएको छ ।

गाजा पट्टीका विभिन्न क्षेत्रहरूमा इजरायली गोलीबारी र ड्रोन आक्रमणबाट चार प्यालेस्टिनीहरूको मृत्यु भएको छ भने अन्य घाइते भएका छन् । राफाहको अल–मवासी, खान युनूसको अल–करारा सहर र उत्तरी गाजाको बेत लाहिया परियोजनामा भएका आक्रमणहरूमा उनीहरूको मृत्यु भएको जनाइएको छ । इजरायली सेनाले युद्धविराम सम्झौताको उल्लंघन गरिरहेको आरोप छ ।