बनेपा

काठमाडौंको शान्तिनगर सुकुम्बासी बस्तीबाट विस्थापित भएका लालबहादुर लिम्बू र उनको परिवार बनेपास्थित होल्डिङ सेन्टरमा कष्टपूर्ण जीवन बिताइरहेका छन्। यसैबीच, भूमिहीन सुकुम्बासी तथा अव्यवस्थित बसोबासी नागरिकमाथि मानवअधिकार उल्लंघन गरी आत्महत्या गर्न बाध्य पारेको भन्दै प्रधानमन्त्री बालेन्द्र साह लगायत जिम्मेवार पदाधिकारीविरुद्ध राष्ट्रिय मानवअधिकार आयोगमा उजुरी परेको छ।

सरकारले काठमाडौं उपत्यकाका सुकुम्बासी बस्तीमा डोजर चलाएपछि विस्थापित भएका करिब ११० जना मानिस बनेपास्थित नेपाल रेडक्रसको प्रशिक्षण केन्द्रमा रहेको होल्डिङ सेन्टरमा बसिरहेका छन्। खाना र बस्नको व्यवस्था भए पनि उनीहरूले बालबालिकाको पढाइ, रोजगारी र स्थायी बसोबासको माग गरेका छन्। सांसद विष्णुमाया बिकले भने होल्डिङ सेन्टरमा सुकुम्बासीलाई कैदीजस्तो व्यवहार गरिएको दाबी गरेकी छन्।