बास्ना थापा

प्रतिनिधिसभाको बैठकमा राष्ट्रिय स्वतन्त्र पार्टी (रास्वपा)का सांसद जगदीश खरेलले विपक्षी दलहरूको विरोधलाई 'तमासा' को संज्ञा दिएपछि विपक्षी सांसदहरू थप आक्रामक बनेका छन्। सांसद खरेलको अभिव्यक्तिपछि संसदमा होहल्ला बढेपछि सभामुख डीपी आर्यालले बैठक १५ मिनेटका लागि स्थगित गरेका छन्।

नेपाली कांग्रेसका महामन्त्री प्रदीप पौडेलले प्रधानमन्त्रीले जानीजानी संसद्को उपेक्षा गरेको आरोप लगाएका छन्। उनले प्रधानमन्त्रीको कार्यशैली नियतवश भएको दाबी गर्दै सरकारलाई समयमै सीमाभित्र राख्न नसके लोकतान्त्रिक मूल्य र प्रणाली संकटमा पर्न सक्ने बताए। पौडेलले लोकतन्त्र कमजोर बनाउने कुनै पनि प्रयासविरुद्ध प्रतिपक्ष चुप बस्न नमिल्ने जिकिर गरे।