श्री एयरलाइन्स

पोखरा अन्तर्राष्ट्रिय विमानस्थल सञ्चालनमा आएको एक वर्षभन्दा बढी समय बितिसक्दा पनि नियमित अन्तर्राष्ट्रिय उडान हुन सकेको छैन, केवल छिटपुट चार्टर उडानहरू मात्र भएका छन्। हिमालय एयरलाइन्सले पोखरा–ल्हासा नियमित व्यावसायिक उडान सुरु गरे पनि यात्रु संख्या कम भएपछि बन्द भएको थियो। हालै भारततर्फ पहिलोपटक मेडिकल चार्टर उडान भएको छ, जसले भविष्यमा नियमित उडानका लागि कूटनीतिक पहल गर्न सहज हुने अपेक्षा गरिएको छ।

पोखरा अन्तर्राष्ट्रिय विमानस्थलबाट पहिलोपटक भारतको भोपालस्थित राजा भोज विमानस्थलमा मेडिकल रेस्क्यु चार्टर उडान भएको छ। श्री एयरलाइन्सको जहाजले मुक्तिनाथ दर्शनका क्रममा बिरामी परेका भारतीय नागरिक शम्भु दयाल श्रीवास्तवलाई थप उपचारका लागि भारत लगेको हो। यो उडान पोखराबाट भारतका लागि भएको पहिलो चार्टर उडान हो।