स्मृति सेन्चुरी

प्रतिनिधिसभाको बैठकमा विभिन्न दलका सांसदहरूले विकास निर्माणका लागि समानुपातिक बजेट विनियोजन गर्न सरकारसँग माग गरेका छन्। सांसदहरूले पर्यटन, शिक्षा, स्वास्थ्य, पूर्वाधार, कृषि, विपद् जोखिम, सूचना प्रविधि तथा सामाजिक समस्यालगायतका विषयमा सरकारको ध्यानाकर्षण गराएका छन्। यसका साथै, उनीहरूले भूमिहीन सुकुम्बासीलाई लालपुर्जा वितरण, निजी विद्यालयको शुल्क वृद्धि नियन्त्रण र मानव-वन्यजन्तु द्वन्द्व समाधानको पनि माग गरेका छन्।

प्रतिनिधिसभाको बैठकमा सांसदहरूले जनतामाथि बढी कर नलिन र युवा पलायन रोक्न सरकारको ध्यानाकर्षण गराएका छन्। सांसदहरूले फोहरमैला व्यवस्थापनमा कबाडी कर खारेज गर्न, विद्युत् सेवामा अवरोध नगर्न, अलपत्र सडक र पुलको निर्माणलाई तीव्रता दिन, र युवालाई स्वदेशमै रोजगारी सिर्जना गर्नुपर्नेमा जोड दिएका छन्। यसका साथै, ट्याक्सी व्यवसायमा रहेको सिन्डिकेट र कर प्रणालीमा चलखेल भएको भन्दै सांसद महावीर पुनले त्यसलाई खारेज गर्न माग गरेका छन्।