सरकारले शिक्षा क्षेत्रका लागि २१८ अर्ब ३० करोड बजेट विनियोजन गर्‍यो, मेडिकल सिट बढाइने

सरकारले त्रिभुवन विश्वविद्यालय शिक्षण अस्पताल, चिकित्सा विज्ञान राष्ट्रिय प्रतिष्ठान र पाटन स्वास्थ्य विज्ञान प्रतिष्ठानलाई अन्तर्राष्ट्रिय स्तरको विश्वविद्यालयको रूपमा विकास गर्ने घोषणा गरेको छ। अर्थमन्त्री स्वर्णिम वाग्लेले आगामी आर्थिक वर्ष २०८३/८४ को बजेट प्रस्तुत गर्दै यी अस्पताललाई विदेशी विद्यार्थीलाई समेत शिक्षा प्रदान गर्न सक्षम बनाइने बताएका छन्। यस कदमले चिकित्सा शिक्षा र स्वास्थ्य सेवाको गुणस्तर अभिवृद्धि गर्ने अपेक्षा गरिएको छ।

चिकित्सा शिक्षा आयोगको रिक्त उपाध्यक्ष पदको जिम्मेवारी डा. श्रीकृष्ण गिरीलाई दिइएको छ। प्रधानमन्त्री एवं आयोगका अध्यक्ष बालेन शाहले अर्को व्यवस्था नभएसम्मका लागि उनलाई यो जिम्मेवारी सुम्पेका हुन्। यसअघि सार्वजनिक पदाधिकारीको पदमुक्तिसम्बन्धी अध्यादेश कार्यान्वयनपछि आयोगका उपाध्यक्ष डा. अञ्जनीकुमार झासहितका पदाधिकारी पदमुक्त भएका थिए।

केन्द्रबिन्दु मिडिया प्रालिले आयोजना गरेको ‘चौथो संस्करणको केन्द्रबिन्दु प्लस टु एजुकेसन एक्सिलेन्स अवार्ड २०८३’ अन्तर्गत टेक्सास इन्टरनेशनल सेकेन्डरी स्कुल, एनसीसीएस सेकेन्डरी स्कुल र ब्रिजवाटर सेकेन्डरी स्कुललाई ‘बेस्ट प्लस टु अवार्ड’ प्रदान गरिने भएको छ। यी स्कुलहरूलाई उच्च माध्यमिक शिक्षा क्षेत्रमा गुणस्तरीय, व्यवहारिक र प्रविधिमैत्री शिक्षा प्रदान गर्दै विद्यार्थीहरूको शैक्षिक तथा व्यक्तित्व विकासमा पुर्‍याएको योगदानको कदर स्वरूप सम्मान गरिनेछ।

काठमाडौँ जिल्ला अदालतले अनुमति नलिई शैक्षिक परामर्श संस्था सञ्चालन गरेको अभियोगमा दुई जना सञ्चालक रेमलाल मरासिनी र रामेश्वर भारतीलाई जनही १२ दिन कैद सजाय सुनाएको छ । प्रहरीका अनुसार मरासिनी बालाजुस्थित ‘छिन्गु कोरियन भाषा’ तथा भारती माछापोखरीमा सञ्चालित ‘कञ्चनजंघा ल्याङ्वेज इन्स्टिच्युट’का सञ्चालक हुन् । वैदेशिक अध्ययनका लागि विद्यार्थीको कागजात तथा भिसा प्रक्रियामा सहजीकरण गर्ने नाममा कानुनविपरीत गतिविधि भइरहेको सूचनापछि प्रहरीले विभिन्न शैक्षिक परामर्श संस्थामा अनुगमन तथा छापा अभियान सञ्चालन गरेको थियो ।