Photo · www.nepalviews.com
म्यानचेस्टर युनाइटेडले इङ्ग्लिस प्रिमियर लिगमा ब्राइटनलाई ३-० ले पराजित गरेको छ। कप्तान ब्रुनो फर्नान्डेसले एक गोल गर्नुका साथै एक असिस्ट प्रदान गर्दै प्रिमियर लिगको एकै सिजनमा सर्वाधिक असिस्टको कीर्तिमान तोडेका छन्। यस जितले क्लबका लागि स्थायी मुख्य प्रशिक्षक माइकल क्यारिकको पहिलो खेल सुखद बनेको छ।
विप्लव घोष कोशी प्रदेश खेलकुद विकास बोर्डको सदस्यसचिव नियुक्त
सुनसरीका विप्लव घोष कोशी प्रदेश खेलकुद विकास बोर्डको सदस्यसचिवमा नियुक्त भएका छन्। प्रदेश सरकारले सामाजिक विकासमन्त्री रामप्रसाद महतोको सिफारिसमा प्रदेश खेलकुद ऐन र अध्यादेशबमोजिम उनलाई चार वर्षका लागि नियुक्त गरेको हो। यससँगै करिब आठ महिनादेखि नेतृत्वविहीन रहेको बोर्डले पूर्णता पाएको छ।
एसियन गेम्स छनोट खेल्न सिंगापुर जाने नेपाली क्रिकेट टोलीको बिदाइ
नेपाली राष्ट्रिय क्रिकेट टोली एसियन गेम्स क्रिकेट छनोट प्रतियोगिता खेल्नका लागि बिहीबार सिंगापुर प्रस्थान गरेको छ। नेपाल क्रिकेट संघ (क्यान) ले आयोजना गरेको बिदाइ कार्यक्रममा कप्तान दीपेन्द्रसिंह ऐरीले टोलीको तयारी राम्रो रहेको र सिंगापुरमा सकारात्मक नतिजा ल्याउने विश्वास व्यक्त गरे। प्रतियोगिताको सेमिफाइनलमा पुग्ने टोली एसियन गेम्स पुरुष क्रिकेटका लागि छनोट हुनेछन्।
नेपाली महिला क्रिकेट टोली एसियाली खेलकुद छनोटको सेमिफाइनलमा प्रवेश
नेपाली महिला क्रिकेट टोलीले एसियाली खेलकुद महिला क्रिकेट छनोट प्रतियोगिताअन्तर्गत समूह 'बी' को खेलमा इन्डोनेसियालाई चार विकेटले पराजित गर्दै सेमिफाइनलमा स्थान सुरक्षित गरेको छ। मलेसियाको क्वालालम्पुरमा भएको खेलमा नेपालले ११४ रनको लक्ष्य १९.३ ओभरमा ६ विकेट गुमाएर पूरा गर्यो। यस जितसँगै नेपाल प्रतियोगितामा लगातार दोस्रो जित हासिल गर्दै सेमिफाइनलमा पुगेको हो।
रवीन्द्र ढाँट ‘रोड टु यूएफसी’को सेमिफाइनलमा प्रवेश, फिलिपिन्सका फाइटर पराजित
नेपाली मिक्स मार्सल आर्ट्स फाइटर रवीन्द्र ढाँटले प्रतिष्ठित ‘रोड टु यूएफसी’ सिजन ५ को सेमिफाइनलमा प्रवेश गरेका छन्। उनले चीनको मकाउस्थित ग्यालेक्सी एरिनामा भएको ब्यान्टमवेट क्वार्टरफाइनल खेलमा फिलिपिन्सका फाइटर किम्बर्ट एलिन्टोजोनलाई दोस्रो राउन्डमा टेक्निकल नकआउट (टीकेओ) मार्फत पराजित गर्दै यो सफलता हासिल गरेका हुन्। यो जितसँगै ढाँट ‘रोड टु यूएफसी’ मा प्रतिस्पर्धा गर्ने र सेमिफाइनलसम्म पुग्ने पहिलो नेपाली खेलाडी बनेका छन्।
