Photo · kendrabindu.com
नेपाल बार एशोसिएसनले अदालत प्रशासनको अनपेक्षित क्रियाकलाप र गैरजिम्मेवारपूर्ण हर्कको विरोधमा लालटिन बालेर प्रदर्शन गरेको छ। कानुन व्यवसायीहरूले न्यायपालिकाभित्र हराउँदै गएको न्याय, विवेक र स्वच्छ कानुनी प्रक्रियाको खोजी गर्दै अदालत परिसरमा प्रदर्शन गरी ध्यानाकर्षण गराएका हुन्। यसैबीच, पूर्व प्रधानमन्त्री शेरबहादुर देउवाविरुद्ध जारी पक्राउ अनुमतिबारे सर्वोच्च अदालतले विस्तृत सुनुवाइ गर्ने भएको छ।
तनहुँमा ३१ दिनको छोरीको हत्या अभियोगमा आमा पक्राउ
तनहुँको शुक्लागण्डकी नगरपालिका–३ सिद्धार्थ टोलमा ३१ दिनको छोरीलाई खाल्डोमा पुरेर हत्या गरेको अभियोगमा प्रहरीले मैना थापालाई पक्राउ गरेको छ। थापाले आफ्नै छोरी प्रिन्सीका थापालाई घरबेटीको करेसाबारीमा खाल्डो खनेर पुरेको अवस्थामा उनका श्रीमान् गोपाल थापाले फेला पारेका थिए। अस्पतालमा चिकित्सकले शिशुलाई मृत घोषणा गरेपछि प्रहरीले थापालाई नियन्त्रणमा लिएको हो।
राष्ट्रिय मानव अधिकार आयोग: जेनजी आन्दोलनमा प्रहरीको नक्कली फेसबुक पेज प्रयोग
राष्ट्रिय मानव अधिकार आयोगको छानबिन समितिले भदौ २३ र २४ गतेको जेनजी आन्दोलनका क्रममा प्रहरीको नक्कली फेसबुक पेज प्रयोग गरी विद्यार्थीलाई प्रदर्शनमा सहभागी हुन आह्वान गरिएको निष्कर्ष निकालेको छ। प्रतिवेदन अनुसार, उक्त पेजबाट विद्यार्थी पोसाकमा आए प्रहरीले बल प्रयोग नगर्ने भन्दै भ्रमपूर्ण सामग्री प्रसारित गरी विद्यार्थीलाई मानव ढाल बनाउन खोजिएको पाइएको छ।
लागूऔषध सहित विभिन्न स्थानबाट १७ जना पक्राउ
प्रहरीले देशका विभिन्न स्थानबाट लागूऔषध सहित १७ जनालाई पक्राउ गरेको छ। काठमाडौं, कञ्चनपुर, नुवाकोट र सुनसरी लगायतका स्थानमा लागूऔषध कारोबारमा संलग्न व्यक्तिहरूलाई प्रहरीले नियन्त्रणमा लिएको हो।
उच्च अदालत पाटनले पिकअप गाडीमा सिट थप गरी यात्रु बोक्ने अभ्यासबारे सरकारलाई निर्देशन
उच्च अदालत पाटनले सार्वजनिक सवारीका रूपमा दर्ता भएका पिकअप गाडीमा सुरक्षा निकायले सिट थप गरी यात्रु बोक्ने अभ्यासबारे कानूनी कार्यान्वयन सुनिश्चित गर्न सरकारलाई निर्देशनात्मक आदेश जारी गरेको छ। अधिवक्ता डेनिश मुस्यानले दायर गरेको रिटमा अदालतले सवारी तथा यातायात व्यवस्था ऐन, २०४९ को प्रभावकारी कार्यान्वयन सुनिश्चित गर्न निर्देशन दिएको हो।
