Photo · gorkhapatraonline.com
नेपाल प्रहरीले देशका विभिन्न भागबाट लागुऔषधसहित १७ जनालाई पक्राउ गरेको छ। केन्द्रीय प्रहरी समाचार कक्षका अनुसार झापा, सिराहा, कैलाली, मकवानपुर, ललितपुर, उदयपुर, कपिलवस्तु र पर्साबाट उनीहरूलाई नियन्त्रणमा लिइएको हो। प्रहरीले उनीहरूको साथबाट खैरो हेरोइन, गाँजा, ट्रामाडोल र स्पास्मो जस्ता लागुऔषध बरामद गरेको छ।
रेश्मिका हत्या प्रकरणमा उच्च अदालतको आदेशपछि थप तीन युवा पक्राउ
खोटाङको दिप्रुङ चुइचुम्मा गाउँपालिका–४ बतासेकी रेश्मिका परियारको हत्या प्रकरणमा संलग्न रहेको अभियोगमा उच्च अदालत ओखलढुङ्गाको आदेशपछि थप तीन युवालाई प्रहरीले पक्राउ गरेको छ। पक्राउ पर्नेमा हेमन परियार, दीपक श्रेष्ठ र दीपक राई रहेका छन्। गत भदौ ३० गते रेश्मिका मृत अवस्थामा फेला परेकी थिइन्।
सर्वोच्च अदालतले विदेशबाट अनलाइन बयान र वकपत्र गर्न सकिने आदेश दियो
सर्वोच्च अदालतले नेपालमा चलिरहेका मुद्दामा विदेशबाट अनलाइनमार्फत बयान र वकपत्र गराउन सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोगले न्याय सम्पादनलाई सहज बनाउन यो निर्णय गरेको हो। यसअघि विशेष अदालतको एउटा इजलासले भ्रष्टाचार मुद्दामा विदेशबाट अनलाइन बयान दिन नसकिने राय दिएको थियो।
सर्लाहीको दशगजा क्षेत्रमा 'जगन राउत' लेखिएको बालासहित एक पुरुष मृत फेला, प्रहरी अनुसन्धानमा
सर्लाहीको पर्सा गाउँपालिका–१ नजिक नेपाल–भारत सीमास्थित दशगजा क्षेत्रमा एक पुरुष मृत फेला परेका छन्। प्रहरीले मृतकको हातमा ‘जगन राउत’ लेखिएको बाला फेला पारेको छ र घटनाको विस्तृत अनुसन्धान गरिरहेको छ।
सिन्धुली हिरासत मृत्यु प्रकरण: १० प्रहरीलाई कारबाही सिफारिस
सिन्धुलीको इलाका प्रहरी कार्यालय खुर्कोटको हिरासत कक्षमा थुनुवा श्रीकृष्ण विकको मृत्यु भएको घटनामा प्रहरी उपरीक्षकदेखि प्रहरी जवानसम्म १० जनालाई कारबाहीको सिफारिस गरिएको छ। प्रहरी नायब महानिरीक्षक दिनेशकुमार आचार्य नेतृत्वको छानबिन समितिले हिरासत व्यवस्थापन र निगरानीमा कमजोरी देखिएको निष्कर्ष निकाल्दै प्रतिवेदन बुझाएको छ।
