गिरफ्तार

रसुवा प्रहरीले दुई छुट्टाछुट्टै घटनामा विदेशी मुद्रासहित दुई जनालाई पक्राउ गरेको छ। एक जनाको साथबाट १४ हजार ५ सय अमेरिकी डलर र अर्का एक जनाको साथबाट ४३ हजार अमेरिकी डलर बरामद गरिएको छ। पक्राउ परेका व्यक्तिहरूलाई थप अनुसन्धानका लागि राजस्व अनुसन्धान विभाग पठाइएको छ।

प्रहरीले काठमाडौंको गोङ्गबुस्थित काबेली गेष्टहाउसबाट एसएलआरको म्याग्जिन र ४५ राउण्ड गोलीसहित दुई जनालाई पक्राउ गरेको छ। पक्राउ पर्नेमा सप्तरीका खगेन्द्र शर्मा र काठमाडौंका ओमशंकर गुप्ता छन्। उनीहरूमाथि थप अनुसन्धान भइरहेको छ।

सर्लाही प्रहरीले भरुवा बन्दुकसहित बुद्धिमान घलानलाई पक्राउ गरेको छ। यसैबीच, सुनसरीमा प्रहरीले कटुवा पेस्तोलसहित दुई जनालाई नियन्त्रणमा लिएको छ। दुवै घटनामा थप अनुसन्धान भइरहेको प्रहरीले जनाएको छ।

झापाको दमकमा लागूऔषध ब्राउन सुगरको कारोबारमा संलग्न रहेको आरोपमा प्रहरीले दुई जनालाई पक्राउ गरेको छ। पक्राउ परेकामध्ये एक जनाको डेरा कोठाबाट ठूलो परिमाणमा ब्राउन सुगर, नगद र मोबाइल बरामद भएको प्रहरीले जनाएको छ।

झापाको मेचीनगर बसपार्क नजिकैबाट प्रहरीले अत्यधिक मादक पदार्थ सेवन गरी बेहोस अवस्थामा रहेका हरि थापालाई एक लाख १८ हजार नगदसहित उद्धार गरेको छ। उपचारपछि अस्पतालबाट डिस्चार्ज भएका थापा हालसम्म प्रहरीको सम्पर्कमा नआएको प्रहरीले जनाएको छ।