दीपकराज जोशी

संस्कृति, पर्यटन तथा नागरिक उड्डयनमन्त्री खडकराज पौडेलले हिमालको संरक्षण, पर्वतारोहीको सुरक्षा र दिगो पर्यटन प्रवर्द्धनका लागि सरकार पूर्ण रूपमा प्रतिबद्ध रहेको बताएका छन् । यद्यपि, पर्यटन क्षेत्रका सरोकारवालाहरूले भने नीतिहरू बन्ने तर कार्यान्वयन नहुने परिपाटीले लगानीकर्ताको आत्मविश्वास घट्दै गएको र पर्यटन अर्थतन्त्र जोखिममा परेको भन्दै सरकारको कार्यशैली र कानुनी जटिलतामाथि प्रश्न उठाएका छन् ।

नेपाल पर्यटन बोर्डका प्रमुख कार्यकारी अधिकृत दीपकराज जोशीले पर्यटन क्षेत्रका नीतिगत तथा पूर्वाधार सुधारका कार्यक्रम कार्यान्वयनमा ढिलाइ हुँदा उद्योग प्रभावित भएको बताएका छन्। उनले डिजिटल प्रवद्र्धनमा जोड दिइएको र विगतमा प्रचार सामग्रीमा हुने खर्च घटाएर लगानी बढाएको जानकारी दिए।

नेपाल उद्योग परिसंघ (सिएनआई) र नेपाल आर्थिक पत्रकार समाज (सेजन)द्वारा गरिएको 'बजेट वाच'को तेस्रो त्रैमासिक समीक्षा अनुसार, चालु आर्थिक वर्षमा निजी क्षेत्रसँग सम्बन्धित बजेट कार्यान्वयनमा सुधार देखिएको छ। समीक्षामा ७४ बुँदा मध्ये पूर्ण कार्यान्वयन दर बढेको र शून्य कार्यान्वयन दर घटेको पाइएको छ। यसैबीच, पर्यटन क्षेत्रका सरोकारवालाहरूले विदेशी पर्यटक बढाउनका लागि नीतिगत सहजीकरण र सहुलियतको आवश्यकतामा जोड दिएका छन्।