रञ्जिता श्रेष्ठ

नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले वर्तमान सरकारका गतिविधि र निर्णयविरुद्ध आन्दोलनको आवश्यकता देखिएको बताएका छन्। धनगढीमा आयोजित एक कार्यक्रममा बोल्दै उनले सरकारले न्यायपालिकामाथि प्रभाव पार्ने प्रयास गरेको र लोकतान्त्रिक अधिकारमाथि हस्तक्षेप बढाएको आरोप लगाए। उनका अनुसार आन्दोलनका लागि विभिन्न राजनीतिक दल, नागरिक समाज र सर्वसाधारणलाई तयार पार्ने काम भइरहेको छ।

घुस लिएको आरोपमा पक्राउ परेका पूर्वमन्त्री राजकुमार गुप्तालाई सर्वोच्च अदालतले ५० लाख रुपैयाँ नगद धरौटी वा सो बराबरको बैंक ग्यारेन्टी लिई थुनामुक्त गर्न आदेश दिएको छ। विशेष अदालतले पुर्पक्षका लागि थुनामा राख्ने आदेशलाई सर्वोच्चले बदर गरेको हो। अख्तियार दुरुपयोग अनुसन्धान आयोगले गुप्तामाथि सामान्य प्रशासनमन्त्री हुँदा मालपोत कार्यालय कास्कीको सरुवा थमौती र भूमिसम्बन्धी आयोगको अध्यक्ष नियुक्ति दिलाउन घुस लिएको आरोपमा मुद्दा दायर गरेको थियो।