सगरमाथा लुम्बिनी इन्स्योरेन्स

चालु आर्थिक वर्ष २०८२/८३ को वैशाख मसान्तसम्ममा निर्जीवन बीमा र लघु निर्जीवन बीमा कम्पनीहरूले कुल ४१ अर्ब ३९ करोड रुपैयाँभन्दा बढी बीमा शुल्क आर्जन गरेका छन्। नेपाल बीमा प्राधिकरणका अनुसार यो अघिल्लो आर्थिक वर्षको सोही अवधिको तुलनामा १४.८१ प्रतिशतले बढी हो। यस अवधिमा कुल २८ लाख ३० हजार छ सय ५२ वटा बीमा लेख जारी भएका छन्।

नेपालको बीमा क्षेत्रमा दाबी भुक्तानी प्रक्रिया झन्झटिलो, भ्रामक र परम्परागत रहेको राष्ट्रिय वाणिज्य बैंककी वरिष्ठ सहायक प्रतिज्ञा भट्टले औँल्याएकी छन्। उनको अनुसन्धानमूलक लेखअनुसार, नेपाल बीमा प्राधिकरणको प्रतिवेदनले पनि दाबी भुक्तानीमा ढिलाइ, जटिलता र पारदर्शिताको कमीलाई मुख्य चुनौती मानेको छ। भट्टले प्रविधिको प्रयोगले दाबी भुक्तानीलाई द्रुत र पारदर्शी बनाउन सकिने बताएकी छन्।

जिल्ला सहकारी संघ पाल्पाको आयोजना र सगरमाथा लुम्बिनी इन्स्योरेन्सको सहकार्यमा तानसेनमा निर्जीवन बीमा सचेतना तथा सुशासन सम्बन्धी कार्यक्रम सम्पन्न भएको छ। कार्यक्रममा सहकारीका पदाधिकारी र व्यवस्थापकहरूको सहभागिता थियो। प्रमुख कार्यकारी अधिकृत चंकी क्षेत्रीले सहकारीका शेयर सदस्यको बचत र सहकारीको रकम लुटपाट वा हराउने खतराबाट सुरक्षित गर्न बीमा गर्नुपर्ने बताए।