Photo · www.sidhakura.com
काठमाडौं महानगरपालिकाले टुँडिखेलको सैनिक मञ्च दक्षिणतर्फको ६१ हजार २ सय ६३ वर्गमिटर क्षेत्रलाई हरियाली र व्यवस्थित सार्वजनिक स्थलका रूपमा विकास गर्ने काम तीव्र पारेको छ। यस परियोजनाअन्तर्गत घाँसे मैदान निर्माण, दुबो रोपण, बोरिङ निर्माण, पानी व्यवस्थापन र वर्षा पानी पुनर्भरणका लागि ‘वाटर रिचार्ज पिट’ निर्माण गरिनेछ। महानगरपालिकाले यस क्षेत्रमा कुनै स्थायी संरचना नबनाउने र सर्वसाधारणलाई आराम, व्यायाम, खेलकुद तथा सार्वजनिक कार्यक्रमका लागि सहज वातावरण उपलब्ध गराउने उद्देश्य राखेको छ।
पोखरा महानगरपालिकाले अतिक्रमित संरचना हटाउँदै, सडक विस्तारको तयारी
पोखरा महानगरपालिकाले पृथ्वीचोकको मूल सडक क्षेत्रमा रहेका अतिक्रमित संरचनाहरू हटाउने अभियान सुरु गरेको छ। पोखरा उपत्यका नगर विकास समितिको स्वामित्वमा रहेको जग्गामा बनेका भवनहरू डोजर लगाएर भत्काइनेछ। महानगर प्रमुख धनराज आचार्यका अनुसार जग्गा अतिक्रमण गरी बनाइएका संरचना हटाएर उक्त क्षेत्रमा दुई लेनको सडक निर्माण गरिनेछ।
कालिका भगवती गुठी व्यवस्थापन समितिद्वारा शैक्षिक सुधारका लागि अक्षयकोष स्थापना
बागलुङको कालिका भगवती गुठी व्यवस्थापन समितिले कालिका मन्दिर परिसरको पार्किङ शुल्कबाट सङ्कलित रकमलाई शैक्षिक सुधारमा खर्च गर्ने उद्देश्यले दुई आधारभूत विद्यालयमा चार लाखको अक्षयकोष स्थापना गरेको छ। समितिका अध्यक्ष भूपेन्द्र खड्काका अनुसार, यो कोषको ब्याजबाट विपन्न र गरिब परिवारका बालबालिकाहरूलाई शैक्षिक सामग्री खरिद गर्न सहयोग पुग्नेछ।
ट्रेड युनियनद्वारा श्रमिकमैत्री बजेटको माग गर्दै प्रदर्शन
ट्रेड युनियनले श्रमिकमैत्री बजेट ल्याउन माग गर्दै काठमाडौँको माइतीघरदेखि बानेश्वरसम्म खबरदारी र्याली निकालेको छ। प्रदर्शनकारीले कर्मचारीको तलब वृद्धि, होटल तथा पर्यटन क्षेत्रको सेवा शुल्क कायम राख्न र सहकारी पीडितलाई न्याय दिन माग गरेका छन्।
सुकुम्बासी बस्ती भत्काइयो, विस्थापितको व्यवस्थापन अन्योलमा
सरकारले काठमाडौं उपत्यकाका थापाथलीसहितका विभिन्न क्षेत्रमा अनधिकृत रुपमा बसोबास गर्दै आएका अव्यवस्थित बसोवासीहरूको घरटहरा भत्काएको एक महिना बितिसक्दा पनि विस्थापितहरूको उचित पुनस्र्थापना र व्यवस्थापनको विषय अन्योलमा रहेको छ। वागमती नदी किनारका अव्यवस्थित संरचनाहरू हटाएपछि उक्त क्षेत्र हाल बगरमा परिणत भएको छ र भत्किएका संरचनाका अवशेषहरू मात्र बाँकी छन्।
