Photo · www.kathmandupati.com
भारतको नयाँदिल्लीबाट नेपाल हेर्ने युरोपियन युनियन (ईयू) आबद्ध करिब २० देशका गैह्रआवासीय राजदूत तथा मिसन प्रमुखहरू काठमाण्डू आएका छन्। जेनजी आन्दोलनपछि ठूलो संख्यामा युरोपेली राजदूतहरूको यो पहिलो भ्रमण हो, जसको उद्देश्य नेपालको पछिल्लो राजनीतिक, आर्थिक र सामाजिक अवस्था तथा विकासमा ईयूको सहयोगबारे छलफल गर्नु हो।
गण्डकी प्रदेशका मुख्यमन्त्री पाण्डे भन्छन्, नेपालले सन्तुलित कूटनीति अपनाउनुपर्छ
गण्डकी प्रदेशका मुख्यमन्त्री सुरेन्द्रराज पाण्डेले विश्वमा शक्ति राष्ट्रहरूबीचको द्वन्द्वले सामाजिक र आर्थिक क्षेत्र प्रभावित भएकाले नेपालले सन्तुलित कूटनीति अपनाउनुपर्ने बताएका छन् । पोखरामा आयोजित एक कार्यक्रममा बोल्दै उनले राष्ट्रिय हितको संरक्षणका लागि नेपालीहरू एकताबद्ध हुनुपर्नेमा जोड दिए ।
इरानमा इन्टरनेट सुचारु गर्ने संस्था अदालतद्वारा निलम्बित
इरानको न्यायपालिकाले राष्ट्रपति कार्यालयसँग सम्बद्ध इन्टरनेट सेवा सुचारु गर्न आदेश दिने संस्थालाई निलम्बन गर्न आदेश दिएको छ। न्यायपालिकाको 'मिजान अनलाइन'का अनुसार धेरै उजुरीपछि 'स्पेसल हेडक्वार्टर्स फर अर्गनाइजिङ एन्ड गभर्निङ द कन्ट्रिज साइबरस्पेस' नामक संस्थालाई निलम्बन गर्ने निर्णय लिइएको हो। इरानमा सुरक्षासँग सम्बन्धित सर्वोच्च निकाय 'सुप्रिम नेसनल सेक्युरिटी काउन्सिल'ले मात्र देशमा इन्टरनेट सुचारु गर्ने निर्णय लिन सक्ने अधिकार राख्छ।
बङ्गलादेशले अन्तर्राष्ट्रिय मुद्रा कोषसँग नयाँ वित्तीय सहायता प्याकेजबारे छलफल गरिरहेको छ
इरान–अमेरिका/इजरायल युद्धका कारण उत्पन्न आर्थिक दबाबको सामना गर्न बङ्गलादेशले अन्तर्राष्ट्रिय मुद्रा कोष (आइएमएफ) सँग नयाँ वित्तीय सहायता प्याकेजका लागि छलफल गरिरहेको छ। बङ्गलादेशका अधिकारीहरूले इन्धनको मूल्य वृद्धि र ऊर्जा सङ्कट व्यवस्थापन गर्न झण्डै २ अर्ब डलर ऋण जुटाउन प्रयास गरिरहेको बताएका छन्।
अमेरिकी आक्रमणबीच इरानसँगको वार्ता पेचिलो, तनाव बढ्यो
अमेरिकी सेनाले दक्षिणी इरानमा क्षेप्यास्त्र प्रक्षेपण स्थल र खानी बिछ्याउन प्रयोग हुने डुङ्गामाथि ‘आत्मरक्षात्मक’ सैन्य कारबाही गरेको छ। अमेरिकी राष्ट्रपति डोनाल्ड ट्रम्पले तेहरानसँगको वार्ता ‘सकारात्मक ढङ्गले अघि बढिरहेको’ दाबी गरिरहेकै बेला भएको यो कारबाहीले युद्धविरामको नाजुक अवस्थाबीच सैन्य तनाव र कूटनीतिक प्रयास एकैसाथ अघि बढिरहेको सङ्केत गरेको छ। घटनाबारे इरानले औपचारिक प्रतिक्रिया नदिए पनि तेहरानले अमेरिकासँग सम्भावित सहमतिबारे जारी छलफलका लागि आफ्नो संसद्का अध्यक्ष मोहम्मद बाघेर कालिबाफलाई कतार पठाएको छ।
