होटल संघ नेपाल, बाँके

युरोपेली संघ (ईयू) आबद्ध करिब २० देशका गैह्रआवासीय राजदूत तथा मिसन प्रमुखहरूले नेपालको पछिल्लो राजनीतिक, आर्थिक र सामाजिक अवस्था तथा विकासमा ईयूले गरेको सहयोगबारे छलफल गर्न काठमाडौंको भ्रमण गरेका छन्। नेपालका लागि ईयूकी राजदूत भेरोनिक लोरेन्जोको संयोजनमा भएको यस भ्रमणको उद्देश्य नेपालसँगको सम्बन्ध सुदृढ पार्नु र सहकार्यका नयाँ क्षेत्रहरू खोज्नु हो।

नेपाल उद्योग परिसंघ (सिएनआई)ले नेपाल आर्थिक पत्रकार समाज (सेजन)सँगको सहकार्यमा गरेको 'बजेट वाच'को तेस्रो त्रैमासिक समीक्षा अनुसार चालु आर्थिक वर्षको बजेट कार्यान्वयनमा सुधार देखिएको छ। निजी क्षेत्रसँग सम्बन्धित ७४ बुँदामध्ये पूर्ण कार्यान्वयन हुने दर बढेको छ। यसैबीच, पर्यटन क्षेत्रका सरोकारवालाहरूले विदेशी पर्यटक बढाउनका लागि नीतिगत सहजीकरण र विद्युत् महसुलमा सहुलियत आवश्यक रहेको बताएका छन्।

अध्यागमन विभागले विदेशी पर्यटकको सुरक्षा, सेवा प्रवाहको गुणस्तर अभिवृद्धि र सूचना व्यवस्थापनलाई प्रभावकारी बनाउन 'विदेशी नागरिक व्यवस्थापन सूचना प्रणाली' (एफएनएमआईएस) लागू गरेको छ। यो प्रणालीले नेपाल भ्रमण गर्ने विदेशी नागरिकहरूको सुरक्षा, सूचनामा सहजीकरण र सम्भावित अपराध नियन्त्रणमा सहयोग पुर्‍याउने उद्देश्यले विकास गरिएको हो। यस प्रणालीलाई पहिलो चरणमा काठमाडौं उपत्यकाका तारे होटलहरूमा र दोस्रो चरणमा देशभरका विभिन्न पर्यटनसँग सम्बन्धित संस्थामा लागू गरिएको छ।