ट्राफिक प्रहरीले मन्त्रीको गाडीलाई फुटपाथ पार्किङमा कारबाही गर्‍यो

सर्वोच्च अदालतले नेपालमा चलिरहेका मुद्दामा विदेशबाट अनलाइनमार्फत बयान र वकपत्र गराउन सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोगले न्याय सम्पादनलाई सहज बनाउन यो निर्णय गरेको हो। यसअघि विशेष अदालतको एउटा इजलासले भ्रष्टाचार मुद्दामा विदेशबाट अनलाइन बयान दिन नसकिने राय दिएको थियो।

पर्सा जिल्ला अदालतले वीरगञ्ज महानगरपालिकाका मेयर राजेशमान सिंहविरुद्ध नागरिकता सम्बन्धी लिखत किर्ते गरेको कसुरमा पक्राउ पुर्जी जारी गरेको छ। अदालतले अनुसन्धानका लागि प्रहरीलाई अनुमति दिएको हो। मेयर सिंहमाथि झुट्टा विवरण र कागजात खडा गरी नागरिकता किर्ते गरेको आरोपमा लामो समयदेखि छानबिन भइरहेको थियो।

प्रहरीले पूर्वाधार विकास मन्त्रालयका सचिवको कार्यकक्षमा अनधिकृत रूपमा प्रवेश गरी अभद्र व्यवहार र धाकधम्की दिएको आरोपमा उपेन्द्रकुमार शाहीलाई पक्राउ गरेको छ। शाहीले पूर्व सूचना बिना मन्त्रालयको सचिवको कार्यकक्षमा प्रवेश गरी हुलहुज्जत र होहल्ला गरेको आरोप छ।

प्रहरीले ललितपुरको लगनखेल बसपार्क नजिकबाट नक्कली नोटसहित १९ वर्षीय सुरज राईलाई पक्राउ गरेको छ। राईको साथबाट ५०० रुपैयाँ दरका १६ थान नक्कली नेपाली नोट बरामद भएको छ। यस सम्बन्धमा प्रहरीले थप अनुसन्धान गरिरहेको छ।