Photo · newspolar.com
मध्य बङ्गलादेशको टाङ्गैल जिल्लामा सोमबार बिहान भएको एक भीषण ट्रक दुर्घटनामा कम्तीमा १५ जनाको मृत्यु भएको छ भने १० जना घाइते भएका छन् । प्रहरीका अनुसार फलामको रड र अतिरिक्त यात्रु बोकेको ट्रक अनियन्त्रित भई सडकमा पल्टिँदा यो दुर्घटना भएको हो । यो घटना इस्लामिक पर्व ईद अल–अधा अघि यात्रुहरूको चहलपहल बढिरहेका बेला भएको हो ।
जाजरकोटमा गाडी दुर्घटना: ७ जना घाइते, सबैको उपचार जारी
जाजरकोटमा मध्यपहाडी सडकखण्ड अन्तर्गत भेरी नगरपालिका-८, चौखे ढुङ्गा नजिकै लु.प्र. ०१००१ ख. ०१९७ नम्बरको हाइस गाडी दुर्घटना हुँदा ७ जना यात्रु घाइते भएका छन्। बिहान ८ बजे दुर्घटनाको खबर पाएलगत्तै प्रहरी घटनास्थल पुगेर घाइतेहरूको उद्धार गरी जिल्ला अस्पताल जाजरकोटमा उपचारका लागि भर्ना गराएको छ। घाइते सबैको अवस्था खतरामुक्त रहेको अस्पतालले जनाएको छ।
बेल्जियममा रेलले विद्यालय बसलाई ठक्कर दिँदा तीन जनाको मृत्यु
बेल्जियमको बुगेनहाउटमा गुडिरहेको रेलले विद्यार्थी बोकेको मिनीबसलाई ठक्कर दिँदा दुई किशोर र बसका चालकसहित तीन जनाको मृत्यु भएको छ। बेल्जियमका यातायात मन्त्री जीन-लुक क्रुकले यो दुर्घटनालाई दुःखद बताएका छन् भने गृहमन्त्री बर्नार्ड क्विन्टिनले घटनाप्रति स्तब्धता व्यक्त गरेका छन्।
सांसद श्रेष्ठद्वारा संसदमा तीव्र गतिका सवारी साधन नियन्त्रणको माग
राष्ट्रिय स्वतन्त्र पार्टीकी सांसद अनुष्का श्रेष्ठले सडकमा अत्यधिक भारवाहक सवारी साधनको तीव्र गतिको कारण सर्वसाधारणको ज्यान जोखिममा परेको भन्दै संसदमा सरकारको ध्यानाकर्षण गराएकी छिन्। उनले ललितपुरको कार्यविनायक–नखु सडकखण्डमा भएको दुर्घटनाको उदाहरण दिँदै निर्धारित गति सीमाभन्दा बढी गतिमा सवारी चलाउने प्रवृत्ति बढेको र यसले दुर्घटनाको जोखिम उच्च बनाएको दाबी गरिन्।
म्याग्दीको सिरुवारीमा पहिरोले बेनी-जोमसोम सडक अवरुद्ध, यातायात ठप्प
म्याग्दीको रघुगंगा गाउँपालिका-२ माथिल्लो बैसरी (सिरुवारी)मा पहिरो खसेपछि मुस्ताङलाई चीनको कोरला नाका जोड्ने बेनी-जोमसोम सडकखण्डमा यातायात सम्पर्कविच्छेद भएको छ। पहिरोका कारण बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीच बाटोमै रोकिएका छन्।
