Photo · prasashan.com
नेपाल प्रहरीले मानव बेचबिखन तथा ओसारपसारमा संलग्न रहेको अभियोगमा दुई जना भारतीय नागरिक छोटुलाल जांगिड र देवेन्द्रकुमार हरिजनलाई पक्राउ गरेको छ। प्रहरीका अनुसार, ललितपुरबाट एक बालिकालाई फकाई भारतको दिल्ली लैजान बसको टिकट काट्दै गरेको अवस्थामा पीडित बालिकाको उद्धार गरी उनीहरूलाई पक्राउ गरिएको हो। पक्राउ परेका दुवै जनामाथि थप अनुसन्धान भइरहेको छ।
लागूऔषध सहित विभिन्न स्थानबाट १७ जना पक्राउ
प्रहरीले देशका विभिन्न स्थानबाट लागूऔषध सहित १७ जनालाई पक्राउ गरेको छ। काठमाडौं, कञ्चनपुर, नुवाकोट र सुनसरी लगायतका स्थानमा लागूऔषध कारोबारमा संलग्न व्यक्तिहरूलाई प्रहरीले नियन्त्रणमा लिएको हो।
उच्च अदालत पाटनले पिकअप गाडीमा सिट थप गरी यात्रु बोक्ने अभ्यासबारे सरकारलाई निर्देशन
उच्च अदालत पाटनले सार्वजनिक सवारीका रूपमा दर्ता भएका पिकअप गाडीमा सुरक्षा निकायले सिट थप गरी यात्रु बोक्ने अभ्यासबारे कानूनी कार्यान्वयन सुनिश्चित गर्न सरकारलाई निर्देशनात्मक आदेश जारी गरेको छ। अधिवक्ता डेनिश मुस्यानले दायर गरेको रिटमा अदालतले सवारी तथा यातायात व्यवस्था ऐन, २०४९ को प्रभावकारी कार्यान्वयन सुनिश्चित गर्न निर्देशन दिएको हो।
-1778668160.jpg)
सर्वोच्चले विवाह इन्कार गर्दा आत्महत्या दुरुत्साहन नहुने व्याख्या गर्यो
सर्वोच्च अदालतले एक मुद्दामा विवाह गर्न इन्कार गर्दा आत्महत्या दुरुत्साहन ठहर नहुने व्याख्या गरेको छ। न्यायाधीशहरू कुमार रेग्मी र बालकृष्ण ढकालको इजलासले कैलालीको एक मुद्दामा यस्तो फैसला सुनाएको हो, जसको पूर्णपाठ हालै सार्वजनिक भएको छ। अदालतले केवल विवाह इन्कारलाई आत्महत्या दुरुत्साहन मान्नु फौजदारी न्यायमा विकृति ल्याउने ठहर गरेको छ।
सीआईबीले ५६ जनाको सेयर कारोबार रोक्का गर्न धितोपत्र बोर्डलाई पत्र पठायो
केन्द्रीय अनुसन्धान ब्युरो (सीआईबी)ले धितोपत्रसम्बन्धी ऐन, २०६३ अन्तर्गतको कसुरमा अनुसन्धानका लागि भन्दै दीपक भट्टसँग जोडिएका ५६ जना लगानीकर्ता तथा विभिन्न कम्पनीका उच्च पदस्थ अधिकारीहरूको सेयर कारोबार रोक्का गर्न नेपाल धितोपत्र बोर्डलाई पत्र पठाएको छ। सीआईबीले अनुसन्धान अवधिभर सम्बन्धित व्यक्तिहरूको सेयर बिक्री, हस्तान्तरण तथा कारोबार रोक्का राख्न र उनीहरूको नाममा रहेको सम्पूर्ण लगानी तथा धितोपत्र कारोबारको विवरण उपलब्ध गराउन आग्रह गरेको छ।
