पोखरा महानगरपालिकाले फिर्के खोलाको अतिक्रमित संरचना भत्कायो

अष्ट्रेलियामा गरिएको एक अध्ययनले सामान्यभन्दा थोरै तापक्रम वृद्धिले पनि वन्यजन्तु बिरामी पर्ने, अस्पताल भर्ना हुने र मृत्यु हुने जोखिम उल्लेखनीय रूपमा बढाउने देखाएको छ। सिड्नी विश्वविद्यालयको नेतृत्वमा न्यू साउथ वेल्स राज्यका करिब १२ हजार वन्यजन्तुको दुई दशकको स्वास्थ्य अभिलेख विश्लेषण गर्दा औसत तापक्रम २७ डिग्री सेल्सियसभन्दा माथि पुगेपछि यस्तो जोखिम बढेको पाइएको छ। वैज्ञानिकहरूले जलवायु परिवर्तनका कारण वन्यजन्तुमाथि गम्भीर खतरा बढेको भन्दै तत्काल संरक्षणका प्रभावकारी कदम चाल्न चेतावनी दिएका छन्।

सङ्खुवासभाको मकालु वरुण राष्ट्रिय निकुञ्जले बहुमूल्य जडीबुटी यार्सागुम्बा संकलनका लागि जेठ २५ गतेदेखि एक महिनाको अवधि खुला गरेको छ। निकुञ्ज कार्यालयका सूचना अधिकारी संस्कार सुवेदीका अनुसार अनुमति लिएका व्यक्ति वा समूहले जेठ २५ देखि असार २५ गतेसम्म यार्सागुम्बा संकलन गर्न पाउनेछन्। यसबाट स्थानीय बासिन्दाको आम्दानीको स्रोत जुट्ने अपेक्षा गरिएको छ।

वनमन्त्री गीता चौधरीले जंगली रातो बाँदरलाई कृषि हानिकारक वन्यजन्तु घोषणा गरिएको र निजी खेतीमा क्षति पुर्‍याएमा धनीले धपाउन वा पक्रन सक्ने व्यवस्था रहेको बताएकी छन्। उनले बाँदर आतंक नियन्त्रणका लागि उच्चस्तरीय कार्यदल गठन गरी तीन महिनाभित्र अध्ययन प्रतिवेदन पेस गर्ने जानकारी दिइन्।

सांसद डा. सुजाता तामाङले जलवायु परिवर्तन, वातावरणीय प्रदूषण, जैविक विविधताको ह्रास तथा बढ्दो बाँझो जमिनप्रति चिन्ता व्यक्त गर्दै प्रकृतिमैत्री विकास नीतिमा जोड दिन सरकारको ध्यानाकर्षण गराएकी छन्। उनले नेपालले हरितगृह ग्यास उत्सर्जनमा नगण्य योगदान दिए पनि तापक्रम वृद्धि, हिमाल पग्लिने क्रम, अनियमित वर्षा तथा प्राकृतिक विपद्का कारण ठूलो क्षति व्यहोर्नुपरेको बताइन्।