Photo · nagariknews.nagariknetwork.com
लिम्बु समुदायको मौलिक संस्कृति, परम्परा र पहिचानलाई नयाँ पुस्तामा हस्तान्तरण गर्ने उद्देश्यले धरानमा च्याब्रुङ नाच प्रशिक्षण सञ्चालन भइरहेको छ। प्रशिक्षक कुमार हुक्पा चोङ्बाङका अनुसार आधुनिकताको प्रभावले युवापुस्तामा मौलिक संस्कृतिप्रतिको आकर्षण घट्दै गएकाले यस्ता प्रशिक्षणले संरक्षणमा महत्वपूर्ण भूमिका खेल्नेछ। धरान उपमहानगरपालिकाको आर्थिक सहयोग र किरात याक्थुङ चुम्लुङ धरान–१९ कार्यसमितिको आयोजनामा यो प्रशिक्षण सञ्चालन भएको छ।
कान्तिपुर थिएटरमा भारतीय लेखक कुलदीप कुणालको नाटक ‘महाभारत’ मञ्चन सुरु
कान्तिपुर थिएटरमा आजदेखि भारतीय लेखक कुलदीप कुणालको नाटक ‘महाभारत’को नेपाली रूपान्तरण मञ्चन सुरु भएको छ। हास्यव्यङ्ग्य कलाकार मनोज गजुरेल पहिलोपटक नाटकमा अभिनय गर्दैछन् भने रमेश बुढाथोकी र सुवर्ण थापाको पनि अभिनय रहनेछ। नवीन भट्टले यस नाटकको नेपाली रूपान्तरण, डिजाइन र निर्देशन गरेका छन्।
बौद्ध महोत्सव २०८३ जेठ २३ मा आयोजना हुने, संस्कृति र पर्यटन प्रवर्द्धनमा जोड
काठमाडौं महानगरपालिका वडा नम्बर ६ को आयोजनामा आगामी जेठ २३ गते ‘बौद्ध महोत्सव २०८३’ आयोजना हुने भएको छ। “हाम्रो संस्कृति, हाम्रो उत्सव” भन्ने नाराका साथ सञ्चालन हुने यस महोत्सवले बौद्ध क्षेत्रको धार्मिक, सांस्कृतिक तथा ऐतिहासिक सम्पदाको प्रवर्द्धन गर्ने लक्ष्य राखेको छ। वडा अध्यक्ष भुवन लामाका अनुसार यो महोत्सव बौद्ध क्षेत्रको संस्कृति, पर्यटन, स्थानीय व्यवसाय र समुदायलाई जोड्ने साझा अभियान हो।
छैटौं नेपाल आदिवासी जनजाति चलचित्र महोत्सव काठमाडौंमा हुने
आदिवासी जनजाति चलचित्र महासंघको आयोजनामा जेठ १७ देखि १९ गतेसम्म काठमाडौंस्थित चलचित्र विकास बोर्डमा छैटौं नेपाल आदिवासी जनजाति चलचित्र महोत्सव आयोजना हुने भएको छ। महोत्सवमा विभिन्न समुदायका कथानक चलचित्र, लघु चलचित्र, वृत्तचित्र र एआई जेनेरेटेड वृत्तचित्र प्रदर्शन गरिनेछन्। यस वर्षको महोत्सवलाई चलचित्र प्रदर्शनका साथै सांस्कृतिक न्याय, आत्मप्रतिनिधित्व, भाषिक पुनर्जागरण र औपनिवेशिकताविरुद्धको प्रतिरोधको माध्यमका रूपमा प्रस्तुत गरिने महोत्सव निर्देशक सागर केरुङले बताएका छन्।
चलचित्र ‘गौँथली’को टिजर सार्वजनिक, साउन १ मा प्रदर्शन
चलचित्र ‘गौँथली’को टिजर सार्वजनिक भएको छ, जसमा मुख्य पात्रको कथालाई उजागर गरिएको छ । टिजरले आमाले छोरीको घर बसाउन गरेको प्रयास र छोरीले घरमा भोग्नुपरेको व्यवहारलाई देखाएको छ । श्रीमान्को फरक व्यवहारबाट आजित श्रीमती र छोरीको समुन्नत परिवार चाहने आमाको कथालाई यसले समेटेको छ ।
