गोपाल हमाल

कैलालीको धनगढी उपमहानगरपालिका–१६, रामपुरस्थित धार्मिक एवं ऐतिहासिक महत्वको बेहडाबाबामा आजदेखि गङ्गादशहरा मेला सुरु भएको छ । मन्दिर व्यवस्थापन समितिका अध्यक्ष खेमबहादुर चन्दका अनुसार आज राति १२ बजे जल चढाएर पूजाअर्चना गरी मेलाको सुरुवात गर्ने परम्परा छ । यो मेला जेठ १५ गतेसम्म सञ्चालन हुनेछ ।

सरकारले बाजुरा र हुम्ला जिल्लाको सीमा विवादको प्राविधिक पक्ष अध्ययन गरी प्रतिवेदन बुझाउन नापी विभागका उपमहानिर्देशक सुशिल डंगोलको संयोजकत्वमा एक समिति गठन गरेको छ। भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलको अध्यक्षतामा बसेको बैठकले यो निर्णय गरेको हो। यसअघि, सीमा क्षेत्रमा प्रहरी चौकी निर्माणको विषयलाई लिएर दुई पक्षबीच झडप भएको थियो।

सांसदहरूले हुम्ला र बाजुरा जिल्लाको सीमा विवाद तत्काल समाधान गर्न सदनमार्फत सरकारको ध्यानाकर्षण गराएका छन्। उनीहरूले वार्ता र संवादको माध्यमबाट विवाद समाधान गरी अवरुद्ध कर्णाली राजमार्ग खुलाउन माग गरेका छन्। यसका साथै, सीमा विवादका कारण भएको दुर्व्यवहार र सांघातिक आक्रमणका घटनामाथि पनि सरकारको ध्यानाकर्षण गराइएको छ।

बाजुराको लाम्पाटा क्षेत्रमा भएको अमानवीय घटनाको सत्यतथ्य छानबिन गरी संलग्न अराजक समूहलाई कानुनी दायरामा ल्याउन नेपाल भोटे जनजाति सेवा संघले माग गरेको छ। हुम्लाका करिब तीन सय स्थानीय संलग्न रहेको उक्त घटनामा वडा सदस्य, प्रहरी सहायक हवल्दार र गाउँपालिकाका प्रमुख प्रशासकीय अधिकृत घाइते भएका थिए। यो घटना सीमा विवाद नभई प्रहरी चौकी स्थापनापछि जडीबुटी चोरीमा अवरोध पुगेकाले भएको संघको ठहर छ।