टीकापुर नगरपालिका

टीकापुर नगरपालिकाका लेखा अधिकृत देविकृष्ण जैसीविरुद्ध आर्थिक अनियमितता, कार्यालय सञ्चालनमा हस्तक्षेप, प्रतिशतमा रकम असुली र महिला कर्मचारीमाथि अनुचित व्यवहार तथा यौन दुर्व्यवहारको आरोप लगाउँदै एक समूहले ज्ञापनपत्र बुझाएको छ। "क्रान्तिकारी जेन्सी समूह" ले जैसीको तत्काल व्यवहार सुधार, आर्थिक असुली रोक्न र सरुवाको वातावरण बनाउन माग गरेको छ।

कैलालीका किसानहरू केराखेतीसँगै मकै, खुर्सानी र तोरीलगायतका बालीहरू पनि लगाउन थालेका छन्। टीकापुर नगरपालिकाका किसान टेकेन्द्र धामीले आफ्नो साढे ६ बिघा जमिनमा केराखेतीसँगै मकैखेती गरी दोस्रो बाली लिने तयारी गरेका छन्। यसरी बहुबाली खेती गर्दा विपद्बाट जोगिनुका साथै दुईभन्दा बढी बाली उत्पादन लिन सकिने किसानहरूको भनाइ छ।

टीकापुरमा गोबरबाट विभिन्न सजावटका सामग्री उत्पादनसम्बन्धी सीपमूलक तथा आयआर्जनमूलक नौदिने तालिम सुरु भएको छ। टीकापुर नगरपालिकाको सहयोगमा सामुदायिक पशु–चौपाया व्यवस्थापन तथा प्रवद्र्धन समितिले आयोजना गरेको यस तालिममा ५० जना महिला सहभागी छन्। प्रतिनिधिसभा सदस्य कोमल ज्ञवालीले गोबरको प्रयोगबाट महिलालाई आर्थिक आत्मनिर्भर बनाउन सकिने बताएकी छन्।

कैलालीको टीकापुर नगरपालिकाले अपाङ्गता भएका व्यक्तिहरूलाई विपद् पूर्वसूचना तथा व्यवस्थापनसम्बन्धी जानकारी दिन थालेको छ। यस कार्यक्रममार्फत उनीहरूलाई विपद्का समयमा कसरी सुरक्षित रहने, सूचना कसरी लिने र आवश्यक सामग्री कसरी सुरक्षित राख्ने भन्ने सिकाइएको छ। नगरपालिकाले आगामी वर्षको योजनामा अपाङ्गता भएकाहरूको समावेशीकरण र अपाङ्गमैत्री योजनालाई प्राथमिकता दिने तयारी गरेको छ।