पूर्वपश्चिम राजमार्ग

बुटवलको बेलबासमा पूर्वपश्चिम राजमार्गमा बसले मोटरसाइकललाई ठक्कर दिँदा अर्घाखाँचीका ३० वर्षीय अमृत बेल्बासेको मृत्यु भएको छ। प्रहरीका अनुसार काँकडभिट्टाबाट महेन्द्रनगरतर्फ जाँदै गरेको बस विपरीत दिशाबाट आइरहेको मोटरसाइकलमा ठोक्किएको थियो। गम्भीर घाइते बेल्बासेको उपचारका क्रममा लुम्बिनी प्रादेशिक अस्पतालमा मृत्यु भएको हो।

सडक डिभिजन कार्यालय दाङले आफ्नो कार्यक्षेत्रभित्रका राजमार्ग तथा सडक क्षेत्रमा सीमा अतिक्रमण गरी बनाइएका घरटहरा र पर्खाल जस्ता संरचना हटाउन १५ दिने सूचना जारी गरेको छ। सार्वजनिक सडक ऐन २०३१ को विपरीत बनेका संरचनाले सवारी आवागमन र सडक सुरक्षामा असर पारेको भन्दै कार्यालयले तोकिएको अवधिभित्र संरचना नहटाए कानुनी कारबाही गरी खर्च असुल गरिने जनाएको छ।