भन्सार कार्यालय

जिल्ला प्रहरी कार्यालय रौतहटले बैशाख महिनामा सञ्चालन गरेको विशेष सुरक्षा तथा निगरानी अभियान अन्तर्गत तस्करी नियन्त्रण र फरार प्रतिवादी पक्राउ गरी ४६ लाख २३ हजार ७३३ रुपैयाँ राजस्व संकलन गरेको छ। प्रहरी प्रमुख प्रहरी उपरीक्षक सिताराम रिजालका अनुसार यस अवधिमा ५७ जना फरार प्रतिवादी पक्राउ गरी ३२ लाख रुपैयाँभन्दा बढी जरिवाना असुल गरिएको छ।

महालेखा परीक्षकको ६३ औं प्रतिवेदनले नेपालमा विद्युतीय सवारी साधनको पिक मोटर पावर कम देखाएर भन्सार र अन्तःशुल्क छली भएको औंल्याएको छ। रसुवा र तातोपानी भन्सार कार्यालयबाट मात्रै २ अर्ब ५० करोड ६३ लाख १६ हजार रुपैयाँ राजस्व छली भएको पाइएको छ। महालेखाले उक्त रकम छानबिन गरी असुलउपर गर्न सरकारलाई निर्देशन दिएको छ।

पश्चिम नवलपरासीमा सशस्त्र प्रहरी बल, नेपाल नं. २६ गणले ठूलो परिमाणमा अवैध रूपमा लुकाइछिपाइ राखिएको खरबुजाको बियाँ बरामद गरेको छ। प्रतापपुर गाउँपालिका वडा नं. ५ मटरास्थित बाबुराम पालको खाली टहराबाट ४ हजार ७२० केजी बियाँ बरामद गरिएको हो, जसको बजार मूल्य करिब १४ लाख १६ हजार रुपैयाँ छ। बरामद गरिएको सामान आवश्यक कारबाहीका लागि महेशपुर भन्सार कार्यालयमा बुझाइएको छ।