रेडियो नेपाल

जिल्ला समन्वय समिति भक्तपुरका प्रमुख ईश्वर थापाको ६५ वर्षको उमेरमा शिक्षण अस्पताल महाराजगञ्जमा उपचारका क्रममा निधन भएको छ। मुटु तथा उच्च रक्तचापसम्बन्धी समस्याका कारण विगत दुई सातादेखि उनी अस्पतालमा भर्ना थिए।

पत्रकार मिलन ढुंगानालाई चलचित्र पत्रकार संघ नेपालले आफ्नो २७औँ वार्षिकोत्सव तथा राष्ट्रिय चलचित्र पत्रकारिता दिवसको अवसरमा नगद २५ हजार रुपैयाँसहित राष्ट्रिय चलचित्र पत्रकारिता प्रोत्साहन पुरस्कार, २०८३ बाट पुरस्कृत गरेको छ । एक दशकभन्दा लामो समयदेखि पत्रकारितामा सक्रिय ढुंगाना रेडियो नेपाल र एमएनएम मिडियामा आबद्ध छन् ।

सूचना तथा सञ्चार मन्त्रालयले गोरखापत्र संस्थानको महाप्रबन्धक, प्रेस काउन्सिल नेपालको अध्यक्ष र सार्वजनिक सेवा प्रसारण संस्थाको अध्यक्ष पदका लागि खुला प्रतिस्पर्धाबाट उम्मेदवार छनोट गर्न दरखास्त आह्वान गरेको छ। इच्छुक व्यक्तिले जेठ १८ गतेभित्र आवेदन दिन सक्नेछन्।