विष्णुप्रसाद पोखरेल

संघीय संसदको प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले रासायनिक मलको सहज आपूर्ति, मौज्दातको वर्तमान अवस्था र वितरण प्रणालीबारे छलफल गरेको छ। बैठकमा कृषि सामग्री कम्पनी लिमिटेड र साल्ट ट्रेडिङ कर्पोरेशन लिमिटेडका पदाधिकारीहरूसँग आगामी खेती मौसमलाई लक्षित गरी आपूर्ति व्यवस्थापन प्रभावकारी बनाउने विषयमा विस्तृत छलफल भएको छ। सांसदहरूले यस वर्ष मलको अभाव हुन नदिन सरकारको ध्यानाकर्षण गराएका छन्।

कृषि सामग्री कम्पनी लिमिटेडका प्रबन्ध सञ्चालक विष्णुप्रसाद पोखरेलले पर्याप्त बजेट अभावका कारण रासायनिक मल खरिद गर्न नसकिएको बताएका छन्। उनले चालु आर्थिक वर्षमा विनियोजित बजेटले लक्ष्य अनुसार मल खरिद गर्न नसकिएको र हाल मौज्दात रहेको मलले असार अन्त्य वा साउनको पहिलो सातासम्म मात्रै पुग्ने बताएका छन्। बजेट अभावले आगामी वर्ष मलको सङ्कट उत्पन्न हुने चेतावनी समेत उनले दिएका छन्।