कृषि, सहकारी तथा प्राकृतिक स्रोत समिति

प्रतिनिधिसभाको कृषि, सहकारी तथा प्राकृतिक स्रोत समितिमा किसानहरूका लागि रासायनिक मलको सहज आपूर्ति सुनिश्चित गर्ने विषयमा छलफल भएको छ। साल्ट ट्रेडिङ कर्पोरेशन लिमिटेडका प्रवक्ता कुमार राजभण्डारीले आगामी आर्थिक वर्ष २०८३/८४ का लागि ९५ हजार मेट्रिक टन मल खरिदको टेन्डर प्रक्रिया सम्पन्न भएको र ५ हजार टन मल भित्रिसकेको जानकारी दिए। कृषि विकास सचिव डा. राजेन्द्र प्रसाद मिश्रले मल व्यवस्थापनमा निजी क्षेत्रलाई पनि सहभागी गराउनुपर्ने आवश्यकता औंल्याए।

संघीय संसदको प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले रासायनिक मलको सहज आपूर्ति, मौज्दातको वर्तमान अवस्था र वितरण प्रणालीबारे छलफल गरेको छ। बैठकमा कृषि सामग्री कम्पनी लिमिटेड र साल्ट ट्रेडिङ कर्पोरेशन लिमिटेडका पदाधिकारीहरूसँग आगामी खेती मौसमलाई लक्षित गरी आपूर्ति व्यवस्थापन प्रभावकारी बनाउने विषयमा विस्तृत छलफल भएको छ। सांसदहरूले यस वर्ष मलको अभाव हुन नदिन सरकारको ध्यानाकर्षण गराएका छन्।

कृषि, वन तथा पर्यावरण मन्त्रालयका सचिव डा. राजेशप्रसाद मिश्रले मल आपूर्तिलाई सहज बनाउन निजी क्षेत्रलाई पनि सहभागी गराउनुपर्ने बताएका छन् । बुधबार बसेको कृषि, सहकारी तथा प्राकृतिक स्रोत समितिको बैठकमा उनले राज्यले मात्रै मल खरिद गरेर समस्या समाधान नहुने र सरकारी नियन्त्रणमुखी प्रणालीले समस्या बढाएको उल्लेख गर्दै निजी क्षेत्रलाई मल कारोबारमा सहभागी गराउनुपर्ने आवश्यकता औँल्याए । उनले रासायनिक मल अभाव मन्त्रालयको कारणले नभई विश्वव्यापी आपूर्ति संकटका कारण उत्पन्न भएको बताए ।

साल्ट ट्रेडिङ कर्पोरेशन लिमिटेडका नायव प्रमुख कार्यकारी अधिकृत कुमार राजभण्डारीले हाल कम्पनीसँग ३९ हजार मेट्रिक टन रासायनिक मल मौज्दात रहेको बताएका छन्। उनले चालु आर्थिक वर्षमा अन्तर्राष्ट्रिय संकट, बजेट अभाव र बन्दरगाह क्षमताको समस्याका कारण पर्याप्त मल आयात गर्न नसकिएको जानकारी दिए। आगामी दिनमा आपूर्ति निरन्तर राख्ने तयारी भइरहेको उनले बताए।

कृषि सामग्री कम्पनी लिमिटेडका प्रबन्ध सञ्चालक विष्णुप्रसाद पोखरेलले पर्याप्त बजेट अभावका कारण रासायनिक मल खरिद गर्न नसकिएको बताएका छन्। उनले चालु आर्थिक वर्षमा विनियोजित बजेटले लक्ष्य अनुसार मल खरिद गर्न नसकिएको र हाल मौज्दात रहेको मलले असार अन्त्य वा साउनको पहिलो सातासम्म मात्रै पुग्ने बताएका छन्। बजेट अभावले आगामी वर्ष मलको सङ्कट उत्पन्न हुने चेतावनी समेत उनले दिएका छन्।