सम्पत्ति छानबिन आयोग

नेपाल सरकारका सहसचिव जंगबहादुर डाँगीलाई सम्पत्ति छानबिन आयोगमा नियुक्त गरिएको छ । मन्त्रीस्तरीय निर्णयअनुसार नियुक्त भएका डाँगीले सोमबार आयोगमा हाजिर गरेका छन् । उनको नियुक्ति एक वर्षका लागि गरिएको हो ।

पूर्वअर्थमन्त्री वर्षमान पुनले सम्पत्ति छानबिन आयोगलाई प्रधानमन्त्री कार्यालय मातहत राख्ने सरकारको निर्णयको आलोचना गरेका छन्। उनले सुशासनको पक्षमा काम गर्ने भनिएको सरकारले आयोगलाई स्वतन्त्र र अधिकार सम्पन्न बनाउनुपर्नेमा आफू अनुकूल हुने गरी बनाएको आरोप लगाएका छन्। पुनले सरकार छनोटयुक्त सुशासनको पक्षमा देखिएको दाबी गरेका छन्।

नेपाली कांग्रेसका नेता नैनसिंह महरले सरकारका पछिल्ला गतिविधि लोकतान्त्रिक मूल्य, संवैधानिक मर्यादा र विधिको शासनविपरीत रहेको आरोप लगाएका छन्। काठमाडौंमा आयोजित एक कार्यक्रममा बोल्दै उनले सरकारद्वारा गठित सम्पत्ति छानबिन आयोगको कार्यादेश पूर्वाग्रही र चयनात्मक भएको टिप्पणी गरे। महरले आयोगलाई असन्तुष्ट व्यक्तिहरूलाई लक्षित गर्ने उपकरणका रूपमा प्रयोग गर्न खोजिएको आशंका व्यक्त गरे।