सर्वज्ञ वाग्ले

अमेरिकामा बसोबास गर्ने साहित्यकार तीर्थराज पाण्डेयको नयाँ उपन्यास ‘श्रीमती’ को कोलोराडोमा आयोजित नवौँ अन्तर्राष्ट्रिय साहित्य सम्मेलनका अवसरमा विमोचन गरिएको छ। विभिन्न राज्यबाट सहभागी साहित्यकारहरूले उक्त कृतिको सामूहिक विमोचन गरेका हुन्। उपन्यासले नेपाली समाजको सांस्कृतिक र सामाजिक पक्षलाई समेटेको र सुदूरपश्चिमको ग्रामीण परिवेशमा एक युवतीको संघर्षलाई चित्रण गरेको टिप्पणी गरिएको छ।

अमेरिकाको कोलोराडोमा आयोजित तीन दिने नवौँ अन्तर्राष्ट्रिय नेपाली साहित्य सम्मेलन ‘कोलोराडो घोषणापत्र’ जारी गर्दै सम्पन्न भएको छ। अन्तर्राष्ट्रिय नेपाली साहित्य समाज (अनेसास) द्वारा आयोजित यस सम्मेलनमा विश्व साहित्यमा नेपाली साहित्यको प्रवर्द्धन, युवा लेखकलाई प्रोत्साहन र लेखन प्रशिक्षण सञ्चालन जस्ता बुँदाहरू समेटिएका छन्। सम्मेलनमा ९ जना महिला साहित्यकारलाई ‘अनेसास नवरत्न साहित्य सम्मान तथा पुरस्कार’ पनि वितरण गरियो।