सविता भण्डारी

रामेछापको खाँडादेवी गाउँपालिका–४ को रजगाउँमा सीमान्तकृत माझी समुदायलाई लक्षित गरी आयुर्वेद तथा वैकल्पिक चिकित्सालय रामेछापले एक दिने आयुर्वेदिक स्वास्थ्य शिविर आयोजना गरेको छ। यस शिविरमा १७५ भन्दा बढी स्थानीय बासिन्दाले स्वास्थ्य परीक्षण र परामर्श सेवा लिएका छन्। चिकित्सालयका प्रमुख दीपक कार्कीका अनुसार, स्वास्थ्य संस्थामा सहजै पुग्न नसक्ने नागरिकलाई लक्षित गरी यो शिविर सञ्चालन गरिएको हो।

पोखराको सूर्यदर्शन बचत तथा ऋण सहकारी संस्थाको ठगी प्रकरणमा राष्ट्रिय स्वतन्त्र पार्टी (रास्वपा) सभापति रवि लामिछानेसहितका प्रतिवादीहरु विरुद्ध सम्पत्ति शुद्धीकरण र संगठित अपराधसम्बन्धी मुद्दाहरु खारेज भएका छन्। कास्की जिल्ला अदालतले सहकारी ठगीको अभियोग मात्र कायम राखेर अन्य मुद्दा खारेज गर्ने अभियोग संशोधनको अनुमति दिएको हो। महान्यायाधिवक्ताको कार्यालयको यसअघिको निर्णयबमोजिम जिल्ला सरकारी वकिल कार्यालयले दिएको निवेदनमा सुनुवाइ गर्दै अदालतले अभियोग संशोधनको अनुमति दिएको हो।

कास्की जिल्ला अदालतले राष्ट्रिय स्वतन्त्र पार्टीका सभापति रवि लामिछानेसहित गितेन्द्रबाबु राई (जीबी) र छविलाल जोशीविरुद्धको सङ्गठित अपराध र सम्पत्ति शुद्धीकरणसम्बन्धी मुद्दा फिर्ता लिने आदेश गरेको छ। न्यायाधीश हिमलाल बेल्बासेको इजलासले सहकारी ठगीतर्फको अभियोग दाबी कायम राख्दै अन्य मुद्दाको अभियोग दाबी कायम नरहने गरी संशोधन गरेको हो। जिल्ला सरकारी वकिल कार्यालय कास्कीले दिएको निवेदनमा उक्त आदेश भएको हो।