सूर्यदर्शन सहकारी ठगी प्रकरण

कास्की जिल्ला अदालतले राष्ट्रिय स्वतन्त्र पार्टीका सभापति रवि लामिछानेसहित सूर्यदर्शन सहकारी ठगी प्रकरणका प्रतिवादीहरूविरुद्ध दायर गरिएको सम्पत्ति शुद्धीकरण र संगठित अपराधसम्बन्धी अभियोग फिर्ता लिने सरकारी पक्षको निवेदन स्वीकृत गरेको छ। अदालतको यस आदेशसँगै अब लामिछानेसहितका प्रतिवादीहरूमाथि सहकारी ठगीसम्बन्धी आरोप मात्रै कायम रहने भएको छ।

पोखराको सूर्यदर्शन बचत तथा ऋण सहकारी संस्थाको ठगी प्रकरणमा राष्ट्रिय स्वतन्त्र पार्टी (रास्वपा) सभापति रवि लामिछानेसहितका प्रतिवादीहरु विरुद्ध सम्पत्ति शुद्धीकरण र संगठित अपराधसम्बन्धी मुद्दाहरु खारेज भएका छन्। कास्की जिल्ला अदालतले सहकारी ठगीको अभियोग मात्र कायम राखेर अन्य मुद्दा खारेज गर्ने अभियोग संशोधनको अनुमति दिएको हो। महान्यायाधिवक्ताको कार्यालयको यसअघिको निर्णयबमोजिम जिल्ला सरकारी वकिल कार्यालयले दिएको निवेदनमा सुनुवाइ गर्दै अदालतले अभियोग संशोधनको अनुमति दिएको हो।