Photo · nepalnews.com
ताप्लेजुङको पाथीभरा मुक्कुमलुङ क्षेत्रमा निर्माणाधीन केबलकार परियोजना खारेजीको माग गर्दै पहिचानवादीहरू पुनः आन्दोलित भएका छन्। उनीहरूले उक्त क्षेत्रलाई लिम्बु/याक्थुङ समुदायको पवित्र स्थल भन्दै केबलकार निर्माणले वातावरणीय असर, सांस्कृतिक हस्तक्षेप र स्थानीय समुदायको अधिकारमाथि गम्भीर प्रभाव पार्ने दाबी गरेका छन्। रास्वपा सरकार बनेपछि परियोजना रोकिने आश्वासन पाएको उनीहरूको दाबी छ।
पोखरा महानगरपालिकाले अतिक्रमित संरचना हटाउँदै, सडक विस्तारको तयारी
पोखरा महानगरपालिकाले पृथ्वीचोकको मूल सडक क्षेत्रमा अतिक्रमण गरी बनाइएका संरचनाहरू हटाउने अभियान सुरु गरेको छ। पोखरा उपत्यका नगर विकास समितिको स्वामित्वमा रहेको जग्गामा बनेका भवनहरू डोजर लगाएर भत्काइनेछ। महानगर प्रमुख धनराज आचार्यले जग्गा अतिक्रमण गरी बनाइएका संरचना हटाएर त्यस क्षेत्रमा दुई लेनको सडक बनाइने बताएका छन्।
राष्ट्रिय मानव अधिकार आयोगले रवि लामिछानेसहित १६ सांसदमाथि अनुसन्धान गर्न सिफारिस
राष्ट्रिय मानव अधिकार आयोगले नख्खु कारागारबाट कैदीबन्दीहरू बाहिर पठाउने घटनामा राष्ट्रिय स्वतन्त्र पार्टी (रास्वपा)का सभापति रवि लामिछानेसहित १६ जना सांसदहरूको संलग्नता देखिएको भन्दै उनीहरूमाथि सूक्ष्म अनुसन्धान गर्न सिफारिस गरेको छ। आयोगले उक्त कार्य मानव अधिकार उल्लंघनका साथै कारागार ऐन २०७९ अनुसार फौजदारी अपराध भएको निष्कर्ष निकालेको छ। प्रतिवेदनमा लामिछाने र तत्कालीन जेलर सत्यराज जोशीको बयान बाझिएको उल्लेख छ।
गृह मन्त्रालयद्वारा प्रहरीका चार एसपीलाई एसएसपीमा बढुवा गर्न सिफारिस
गृह मन्त्रालयअन्तर्गत बढुवा समितिको सचिवालयले नेपाल प्रहरीका चार जना प्रहरी उपरीक्षक (एसपी) लाई प्रहरी वरिष्ठ उपरीक्षक (एसएसपी) पदमा बढुवाका लागि सिफारिस गरेको छ। बढुवा समितिको बैठकले प्रहरी नियमावली, २०७१ अनुसार जनपद तथा प्राविधिकतर्फका रिक्त पदमा बढुवाका लागि नामावली सार्वजनिक गरेको हो।
सचेतक परियार भन्छन्, समतामूलक समृद्ध राज्य निर्माण गणतन्त्रको मर्म हो
राष्ट्रिय स्वतन्त्र पार्टीका सांसद एवं सत्तारुढ दलका सचेतक प्रकाशचन्द्र परियारले समतामूलक समृद्ध राज्य निर्माण नै गणतन्त्रको मूल मर्म र धर्म भएको बताएका छन्। उनले सामाजिक न्याय र मानवीय समानताका लागि राजनीतिमा होमिएको र गणतन्त्र ल्याउन परिवार गुमाएको अनुभव सुनाए। परियारले नेपालमा गणतन्त्र जनताको चाहनाले आएको बताए।
