गोरखाको मनकामना सडकमा जीप दुर्घटना हुँदा दुई घाइते

नेपाली सेनाको अगुवाइमा कञ्चनपुरको भीमदत्त नगरपालिका-१२ ऐरीस्थित महाकाली नदीमा 'अभ्यास मनसुन-६' नामक विपद् व्यवस्थापन तथा उद्धारसम्बन्धी नमूना अभ्यास गरिएको छ। यस अभ्यासको उद्देश्य विपद्का बेला गरिने उद्धार तथा क्षति न्यूनीकरणका उपायबारे सर्वसाधारणलाई जानकारी गराउनु रहेको छ। अभ्यासमा नेपाली सेनासँगै नेपाल प्रहरी र सशस्त्र प्रहरी बलको टोलीले संयुक्त प्रदर्शन गरेका थिए।

सुनसरीको बराहक्षेत्र नगरपालिका-२ स्थित गहनेखोलामा जङ्गली हात्तीको छावा पानीको दलदलमा फसेर मृत अवस्थामा फेला परेको छ। बिहीबार स्थानीयले हात्तीको बच्चा मृत देखेपछि प्रहरीलाई खबर गरेका थिए। घटनाको विषयमा अनुसन्धान भइरहेको जिल्ला प्रहरी कार्यालय सुनसरीले जनाएको छ।

कपिलवस्तु नगरपालिका वडा नम्बर ३ महिता चोकमा सशस्त्र प्रहरीको गाडीले टेम्पोलाई ठक्कर दिँदा तीन वर्षीय बालक महफुज मुसलमानको मृत्यु भएको छ। दुर्घटनामा टेम्पो चालक शिवप्रसाद चौधरी गम्भीर घाइते भएका छन् भने अन्य ८ जना सामान्य घाइते भएका छन्। प्रहरीले ठक्कर दिने सशस्त्र प्रहरीको गाडी र चालकलाई नियन्त्रणमा लिएको छैन।

पाँचथरको याङवरक गाउँपालिका–१ च्याङथापूका विभिन्न स्थानमा बेमौसमी वर्षापछि गएको पहिरोले २६ घर उच्च जोखिममा परेका छन्। पहिरोले ठिङ्गेपुर कोप्चे, बिरुवा, पेरुङ्गे, चाम्लिङडाँडा, एकराते, खोलाघारी र सुन्दरपुर टोल प्रभावित भएका छन्। तीन वर्षअघि पनि सोही क्षेत्रमा भीषण वर्षापछि पहिरो गएको थियो।