Photo · kendrabindu.com
कृषि, वन तथा पर्यावरणमन्त्री गीता चौधरीले धान रोपाइँको सिजनमा मलको अभाव हुन नदिने गरी सरकारले विशेष पहल गरिरहेको बताएकी छन्। मध्यपूर्वमा द्वन्द्वका कारण मल आपूर्तिमा समस्या आएको उल्लेख गर्दै उनले भारतसँग ५० हजार मेट्रिक टन मल खरिद गर्ने प्रक्रिया अघि बढाइएको जानकारी दिइन्। मन्त्री चौधरीले चालु आर्थिक वर्षको असार मसान्तसम्म करिब ६ लाख मेट्रिक टन मल किसानलाई अनुदानमा उपलब्ध गराइने बताइन्, जुन अहिलेसम्मकै सबैभन्दा बढी परिमाण हुने दाबी गरिन्।
मुस्ताङका किसानलाई ५०% अनुदानमा हाते ट्याक्टरसहित कृषि उपकरण हस्तान्तरण
मुस्ताङका पाँच स्थानीय तहका किसानलाई राष्ट्रिय कृषि आधुनिकीकरण कार्यक्रमअन्तर्गत ५० प्रतिशत अनुदान सहुलियतमा हाते ट्याक्टरसहित नौ प्रकारका कृषि यान्त्रिक उपकरण हस्तान्तरण गरिएको छ। कार्यक्रम कार्यान्वयन एकाइ मुस्ताङले स्याउ र आलु जोनमा सूचीकृत ५७ जना किसानलाई उनीहरूको मागअनुसारका उपकरण मङ्गलबारदेखि वितरण सुरु गरेको हो।
रौतहटमा किसानलाई मौसम पूर्वानुमानका लागि कृषि तथा जलवायु मापन केन्द्र स्थापना
रौतहटको चन्द्रपुर नगरपालिका–९ डुमरियामा किसानलाई मौसमसम्बन्धी पूर्वानुमान उपलब्ध गराउने उद्देश्यले कृषि तथा जलवायु मौसम मापन केन्द्र स्थापना गरिएको छ। चन्द्रपुर नगरपालिकाका प्रमुख सञ्जयकुमार काफ्लेले केन्द्रको उद्घाटन गरेका हुन्। यो केन्द्रले तापक्रम, वर्षा, हावाको गति जस्ता तथ्याङ्क सङ्कलन गरी बाली व्यवस्थापन, सिँचाइ र मल प्रयोगबारे जानकारी दिनेछ।
विराटनगरमा पशु क्वारेन्टाइन ऐन कार्यान्वयनबारे सरोकारवालाबीच अन्तरक्रिया
पशु क्वारेन्टाइन ऐन, नियमावली र मापदण्डको प्रभावकारी कार्यान्वयनका लागि विराटनगरमा सरोकारवाला निकायहरूसँग अन्तरक्रिया कार्यक्रम सम्पन्न भएको छ । कार्यक्रममा सीमा क्षेत्रमा हुने पशु तथा पशुजन्य वस्तुको आयात-निर्यात, रोग नियन्त्रण र कानुनी व्यवस्थाका विषयमा छलफल गरियो । पशु क्वारेन्टाइन कार्यालयका प्रमुख विदुर गौत्तमले कानुनी व्यवस्था, कार्यालयका गतिविधि र ऐन विपरीत कार्य गर्नेमाथि हुने कारबाहीबारे प्रस्तुतीकरण गरे ।
विश्व दुग्ध दिवसको अवसरमा काठमाडौंमा कविता प्रतियोगिता सम्पन्न
नेपाल डेरी एसोसिएसनको आयोजनामा काठमाडौं इङ्गलिस स्कुल, नक्सालमा विश्व दुग्ध दिवसको पूर्वसन्ध्यामा कविता प्रतियोगिता सम्पन्न भएको छ। 'दुग्ध क्षेत्रको दिगो विकास: पोषण सुरक्षा र आर्थिक समृद्धिको आधार' तथा 'महिला कृषकहरूको सम्मान' भन्ने नाराका साथ आयोजित कार्यक्रममा दुग्धजन्य पदार्थको उपयोगिताबारे छलफल गरियो। कार्यक्रममा नेपाल डेरी एसोसिएसनका केन्द्रीय अध्यक्ष प्रल्हाद दाहालले विद्यालय पाठ्यक्रममा कृषक र कृषि पेशालाई कमजोर रूपमा चित्रण गरिएको विषयमा आपत्ति जनाउँदै पाठ्यक्रम परिमार्जनका लागि ध्यानाकर्षण गराए।
