नेपाली काँग्रेसद्वारा संघीय सांसदहरूका लागि संसदीय अभिमुखीकरण कार्यक्रम

सङ्घीय संसद्का दुवै सदन, प्रतिनिधिसभा र राष्ट्रियसभाको बैठक आज छुट्टाछुट्टै समयमा बस्दैछन्। बैठकमा अर्थमन्त्री डा. स्वर्णिम वाग्लेले आर्थिक वर्ष २०८२/८३ को आर्थिक सर्वेक्षण पेस गर्नेछन्। साथै, सूचना तथा सञ्चारमन्त्री डा. विक्रम तिमिल्सिनाले चलचित्र विधेयक, २०८२ माथि विचार गरियोस् भन्ने प्रस्ताव पेस गर्नेछन् भने अभौतिक सांस्कृतिक सम्पदा (संरक्षण) विधेयक, २०८१ र वैकल्पिक विकास वित्त परिचालन विधेयक, २०८२ सम्बन्धी प्रस्तावहरू पनि पेस हुनेछन्।

राष्ट्रिय स्वतन्त्र पार्टी (रास्वपा) ले आफ्नो पहिलो राष्ट्रिय महाधिवेशनको तयारीका लागि विस्तृत कार्यतालिका सार्वजनिक गरेको छ। पार्टीको केन्द्रीय निर्वाचन आयोगले स्वीकृत गरेको यस कार्यतालिका अनुसार जेठ १५ गतेसम्म ७७ जिल्ला र सात प्रदेशमा निर्वाचन समिति गठन गरिनेछ। महाधिवेशन आगामी असार ७, ८ र ९ गते चितवनमा आयोजना हुनेछ।

पोखरा बसपार्क निर्माणका लागि अधिग्रहण गरिएको जग्गाको सट्टापट्टा, बिक्री वितरण र क्षतिपूर्ति प्रक्रियामा उठेका गुनासा तथा विवादको छानबिन गर्न पोखरा उपत्यका नगर विकास समितिले पूर्वन्यायाधीश शङ्करराज बरालको अध्यक्षतामा तीन सदस्यीय समिति गठन गरेको छ। समितिले विगत ५१ वर्षको अवधिमा भएका निर्णय र वितरण प्रक्रियाको अध्ययन गरी १५ कार्यदिनभित्र प्रतिवेदन बुझाउनेछ।

लुम्बिनी प्रदेशसभामा आगामी आर्थिक वर्ष २०८३/८४ को विनियोजन विधेयकका सिद्धान्त र प्राथमिकतामाथि छलफल सुरु भएको छ। आर्थिक मामिला तथा योजनामन्त्री धनेन्द्र कार्कीले प्रस्तुत गरेको बजेट उत्पादन, रोजगारी, पूर्वाधार विकास, सुशासन र सामाजिक न्यायमा केन्द्रित हुने बताइएको छ। सीमित स्रोत र बढ्दो दायित्वका बीच यथार्थपरक, कार्यान्वयनयोग्य र परिणाममुखी बजेट ल्याउने तयारी छ।