Photo · www.kathmandupati.com
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, विक्रम संवत् २०८३ वैशाखयता शनिबारसम्म भएका १ हजार ३४२ विपद्जन्य घटनामा देशभर ७० जनाको मृत्यु भएको छ भने ३३३ जना घाइते भएका छन्। प्रवक्ता शान्ति महतका अनुसार लेक लागेर १६, चट्याङबाट १४ र आगलागीबाट ११ जनाको मृत्यु भएको छ। यस अवधिमा १ हजार ६२१ परिवार प्रभावित भएका छन्।
म्याग्दीको सिरुवारीमा पहिरोले बेनी-जोमसोम सडक अवरुद्ध, यातायात ठप्प
म्याग्दीको रघुगंगा गाउँपालिका-२ माथिल्लो बैसरी (सिरुवारी)मा पहिरो खसेपछि मुस्ताङलाई चीनको कोरला नाका जोड्ने बेनी-जोमसोम सडकखण्डमा यातायात सम्पर्कविच्छेद भएको छ। पहिरोका कारण बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीच बाटोमै रोकिएका छन्।
मनसुनी विपद्: खोज तथा उद्धारका लागि २६ हजार सुरक्षाकर्मी तयारी अवस्थामा
नेपालमा मनसुनी विपद्का घटनामा खोज तथा उद्धारका लागि सरकारले १३४ गोताखोरसहित २६ हजार २१९ सुरक्षाकर्मी तयारी अवस्थामा राखेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार तीनवटै सुरक्षा निकायका जनशक्ति देशभर आवश्यकता अनुसार परिचालित हुनेछन्। प्राधिकरणकी प्रवक्ता शान्ति महतले मनसुनी विपद्का लागि राष्ट्रिय प्रतिकार्ययोजना तयार पारी लागू भइसकेको र निकायहरूलाई जिम्मेवारी तोकिएको बताइन्।
हुम्लामा भेडा चराउन गएका युवकको लेक लागेर मृत्यु
हुम्ला र बाजुरा जिल्लाको सीमा विवादित रानी खर्क लाम्पाटा क्षेत्रमा भेडा चराउन गएका २८ वर्षीय इव रोकायाको लेक लागेर मृत्यु भएको छ। जिल्ला प्रहरी कार्यालय हुम्लाका प्रहरी नायब उपरीक्षक शङ्कर खड्काका अनुसार, थाली सामुदायिक वन क्षेत्रमा मङ्गलबार दिउँसो रोकायाको मृत्यु भएको हो।
दक्षिण कोरियामा ओभरपास भत्किँदा तीन कामदारको मृत्यु, तीन घाइते
दक्षिण कोरियाको राजधानी सियोलमा भत्काउने क्रममा रहेको एक ओभरपासको माथिल्लो भाग भत्किँदा तीन जना कामदारको मृत्यु भएको छ भने अन्य तीन जना घाइते भएका छन्। स्थानीय सञ्चारमाध्यमका अनुसार मङ्गलबार दिउँसो ओभरपास भत्काउने कार्य भइरहेको स्थानमा सो दुर्घटना भएको हो।
