सोलुखुम्बुको हुँगा खोलामा अज्ञात पुरुषको शव फेला, पहिचान खुल्न बाँकी

पर्सा जिल्ला अदालतले वीरगञ्ज महानगरपालिकाका मेयर राजेशमान सिंहविरुद्ध नागरिकता सम्बन्धी लिखत किर्ते गरेको कसुरमा पक्राउ पुर्जी जारी गरेको छ। अदालतले अनुसन्धानका लागि प्रहरीलाई अनुमति दिएको हो। मेयर सिंहमाथि झुट्टा विवरण र कागजात खडा गरी नागरिकता किर्ते गरेको आरोपमा लामो समयदेखि छानबिन भइरहेको थियो।

सर्वोच्च अदालतले अदालतहरूमा लागू गरिएको गोला प्रक्रियाद्वारा पेशी व्यवस्थापन गर्ने प्रणालीमा कुनै परिवर्तन वा पुनर्विचार गर्ने सोच नरहेको स्पष्ट पारेको छ। केही सञ्चार माध्यम र सामाजिक सञ्जालमा गोला प्रक्रियाको विकल्प खोजिन लागेको भन्ने समाचार आएपछि सर्वोच्चले विज्ञप्ति जारी गर्दै यस्तो जानकारी दिएको हो। प्रवक्ता अर्जुनप्रसाद कोइरालाद्वारा जारी विज्ञप्तिमा दैनिक पेशी व्यवस्थापनका लागि अवलम्बन गरिएको गोला प्रक्रियाबारे पुनर्विचार गर्ने कुनै पनि सोच, धारणा वा योजना औपचारिक रूपमा कतै पनि चर्चा र छलफलमा नरहेको उल्लेख छ।

राष्ट्रिय मानव अधिकार आयोगले ‘रुटिन अफ नेपाल बन्द’ फेसबुक पेजका सञ्चालक भिक्टर पौडेल, चलचित्र निर्देशक निश्चल बस्नेत, युट्युबर भाग्य न्यौपाने लगायत ११ जना व्यक्तिमाथि जेनजी आन्दोलनका क्रममा मानव अधिकार उल्लंघनका घटनामा संलग्नताको विषयमा थप अनुसन्धान गर्न सरकारलाई सिफारिस गरेको छ। आयोगले यी व्यक्तिहरूले प्रदर्शन भड्काउन भूमिका खेलेको ठहर गर्दै उनीहरूलाई कानुनी दायरामा ल्याउन आग्रह गरेको छ।

झापाको भद्रपुर र बाँकेको नेपालगञ्जबाट लागूऔषध ब्राउनसुगरसहित तीन जना पक्राउ परेका छन्। यसैबीच, किर्ते नागरिकता मुद्दामा पक्राउ अनुमति जारी भएका वीरगञ्ज महानगरपालिकाका मेयर राजेशमान सिंहलाई पक्राउ गर्न प्रहरीले विशेष टोली परिचालन गरेको छ।