Photo · prasashan.com
राष्ट्रिय स्वतन्त्र पार्टी (रास्वपा) सांसद केपी खनालले आफ्नो निर्वाचन क्षेत्रका ५५ जना एसईई उत्तीर्ण विद्यार्थीहरूलाई लक्षित गरी ‘एमपी स्कलरसिप प्रोग्राम’ अन्तर्गत पूर्ण छात्रवृत्ति घोषणा गरेका छन्। चुनावका बेला अभिभावकहरूले आफूप्रति देखाएको आशालाई सम्बोधन गर्न यो कार्यक्रम ल्याइएको खनालले बताएका छन्।
कैलालीमा अत्यधिक गर्मीले विद्यार्थी बेहोस, पठनपाठन प्रभावित
कैलाली जिल्लामा अत्यधिक गर्मीका कारण विद्यार्थीहरू कक्षा कोठामै बेहोस हुन थालेका छन्। ४० डिग्री सेल्सियसभन्दा बढी तापक्रम पुगेपछि पठनपाठनमा कठिनाई भएको छ। गर्मीले विद्यार्थीहरू बिरामी पर्नुका साथै टाउको दुख्ने र चक्कर आउने जस्ता समस्या बढेको छ।
नेपाल संस्कृत विश्वविद्यालयमा पदाधिकारी नियुक्तिका लागि दरखास्त आह्वान
सरकारले नेपाल संस्कृत विश्वविद्यालयका रिक्त उपकुलपति, शिक्षाध्यक्ष र कुलसचिव पदका लागि खुला प्रतिस्पर्धामा आधारित दरखास्त आह्वान गरेको छ। पारदर्शिता, योग्यता प्रणाली र प्रक्रियागत निष्पक्षता सुनिश्चित गर्न नयाँ कार्यविधि २०८३ बमोजिम यो प्रक्रिया सुरु गरिएको हो। इच्छुक योग्य व्यक्तिले सूचना प्रकाशित भएको मितिले १० दिनभित्र शिक्षा, विज्ञान तथा प्रविधि मन्त्रालयको वेबसाइटमार्फत अनलाइन आवेदन दिन सक्नेछन्।
काठमाडौं महानगरपालिकामा कक्षा ११ र १२ को छात्रवृत्तिका लागि २६,८८८ विद्यार्थीको आवेदन
काठमाडौं महानगरपालिका भित्रका विद्यालयहरूबाट कक्षा ११ र १२ मा छात्रवृत्ति प्राप्त गर्न २६,८८८ जना विद्यार्थीले अनलाइन आवेदन फाराम भरेका छन्। यसरी आवेदन दिनेमा १६,५४९ छात्र, १०,३३३ छात्रा र ६ जना अन्य छन्। आवेदकमध्ये २३,४९९ जनाको आवेदन स्वीकृत भइसकेको छ भने ८४ आवेदन अस्वीकृत भएका छन्।
राष्ट्रिय परीक्षा बोर्डले कक्षा १२ को नतिजा ४५ दिनभित्रै सार्वजनिक गर्ने तयारी
राष्ट्रिय परीक्षा बोर्डले यस पटक कक्षा १२ को परीक्षाफल परीक्षा सकिएको ४५ दिनभित्रै सार्वजनिक गर्ने तयारी गरेको छ। नतिजा प्रकाशनको कामलाई तीव्रता दिँदै हालसम्म ५० प्रतिशतभन्दा बढी प्रक्रिया पूरा भएको बोर्डले जनाएको छ। देशभरका ४२ केन्द्रमा उत्तरपुस्तिका परीक्षणसँगै सम्परीक्षण र प्राप्ताङ्क कम्प्युटरमा इन्ट्री गर्ने काम पनि सँगसँगै अगाडि बढाइएको छ।
