Photo · www.makalukhabar.com
नेपाली काँग्रेसकी सांसद गीता गुरुङले विगतका संरचनागत विभेद र कुप्रथाका कारण महिलाले भोगेको पीडाप्रति राज्यले औपचारिक रूपमा माफी माग्नुपर्ने माग गरेकी छन्। प्रतिनिधि सभाको बैठकमा बोल्दै उनले सरकारले दलित समुदायसँग माफी मागेर सकारात्मक सुरुवात गरेजस्तै अब महिलाहरूसँग पनि क्षमायाचना गर्नुपर्ने बताइन्।
सहकारीमा बेथिति, कमजोर नियमनले जनविश्वास गुमेको निष्कर्ष
सरकारले सार्वजनिक गरेको 'सहकारीमा भएको बेथिति जाँचबुझ आयोग, २०८२' को प्रतिवेदनले सहकारी क्षेत्रमा वित्तीय अनियमितता, बचतकर्ताको रकम दुरुपयोग र कमजोर नियमनका कारण जनविश्वास गुमेको निष्कर्ष निकालेको छ। प्रतिवेदनले दर्ता, कार्यक्षेत्र विस्तार र सेवा केन्द्र थप गर्ने क्रममा मापदण्ड पालना नहुँदा धेरै सहकारी समस्याग्रस्त बनेको औंल्याएको छ।
बुद्ध दर्शन सहकारीबाट ३४ जना बचतकर्ताको रकम फिर्ता
काठमाडौं महानगरपालिका सहकारी विभागको रोहवरमा बुद्ध दर्शन सेभिङ् एण्ड क्रेडिट कोअपरेटिभ लिमिटेडले ३४ जना बचतकर्ताको बचत रकम फिर्ता दिएको छ। सहकारीले आगामी एक महिनाभित्र ५ लाख रुपैयाँसम्म बचत गर्ने बचतकर्ताको रकम फिर्ता दिने योजना बनाएको छ।
पोखरा महानगरपालिकाले अतिक्रमित संरचना हटाउने अभियान सुरु गर्यो
पोखरा महानगरपालिकाले पृथ्वीचोकको मूल सडकको हङकङ बजार हुँदै नयाँबजार निस्कने सडकछेउका अतिक्रमित संरचना हटाउने अभियान सुरु गरेको छ। महानगरपालिकाले जग्गा अतिक्रमण गरी बनाइएका भवनहरूमा डोजर चलाउने तयारी गरेको छ। यस अभियान अन्तर्गत विभिन्न संघसंस्थाका भवन, सार्वजनिक शौचालय लगायतका संरचना हटाइनेछन्।
सरकारले समस्याग्रस्त सहकारीको ऋण असुलीबाट प्राप्त रकम बचतकर्तालाई फिर्ता गरिरहेको स्पष्ट पारेको छ
सरकारले समस्याग्रस्त सहकारीबाट ऋण असुलीबाट प्राप्त रकम नै पीडित बचतकर्तालाई फिर्ता गरिएको स्पष्ट पारेको छ। भूमि व्यवस्था, सहकारी, संघीय मामिला तथा सामान्य प्रशासन मन्त्रालय अन्तर्गतको समस्याग्रस्त सहकारी व्यवस्थापन समितिले राज्यकोषको रकमबाट बचत फिर्ता गरिएको भन्ने गुनासो तथा भ्रममा ध्यानाकर्षण भएको जनाएको छ। हालसम्म २० सहकारीका १० हजारभन्दा कम बचत मागदाबी भएका साना बचतकर्ताको बचत चरणबद्ध रूपमा फिर्ता भइरहेको छ।
