जलेश्वर नगरपालिका

महोत्तरी जिल्लाको जलेश्वर नगरपालिका–१२ थरुवाही गाउँबाट विद्यालय हिँडेका १२ वर्षीय गौतम यादव सात दिनदेखि बेपत्ता भएका छन्। जेठ ७ गते बिहान विद्यालय जान निस्किएका गौतम हालसम्म सम्पर्कमा नआएपछि परिवारले अपहरण वा मानव बेचबिखनको आशंकामा जिल्ला प्रहरी कार्यालय महोत्तरीमा निवेदन दर्ता गराएको छ। प्रहरीले घटनाबारे अनुसन्धान तथा खोजी जारी राखेको जनाएको छ।

महोत्तरीको जलेश्वरमा यात्रुवाहक बसले ठक्कर दिँदा ७५ वर्षीय पैदल यात्री चन्देश्वर साहको मृत्यु भएको छ। जिल्ला प्रहरी कार्यालयका प्रहरी नायब उपरीक्षक पञ्चलाल गोलेका अनुसार जलेश्वरबाट जनकपुरतर्फ जाँदै गरेको बसले मटिहानी चोकमा साहलाई ठक्कर दिएको थियो। दुर्घटनापछि बस र चालक सत्यनारायण यादवलाई प्रहरीले नियन्त्रणमा लिएको छ।